Овогодинешната конференција е во организација на Северна Македонија и во ко-организација со земјата домаќин, Јордан. Како што соопштија од МНР, ова е прв пат, после седум години, одржувањето на медитеранската конференција да се врати кај партнерите од регионот, што се смета за голем чекор во зајакнувањето на врските меѓу организацијата и партнерите од Медитеранот.
Во Јордан пристигнати се преку 200 учесници, кои на дводневната конференција ќе дискутираат на неколку различни приоритетни теми поврзани со зајакнувањето на младите и жените, справувањето со ризиците од климатските промени и трговијата со луѓе, и сл.
Покрај домаќините, министрите Османи и Сафади, воведни обраќања се очекува да имаат и министерот за надворешни работи на Полска, Збигњев Рау, како актуелен претседавач со Организацијата и Генералната секретарка на ОБСЕ, Хелга Шмид.
По завршувањето на воведниот панел, министерот Османи, придружуван од останатите високи претставници – воведничари, најавија од МНР, ќе остварат средба со Кралот на Јордан, Абдула бин ел-Хусеин II