КОВАЧЕВСКИ : ВО НОВИОТ МАНДАТ НА СДСМ, СИТЕ ПЕНЗИОНЕРИ ЌЕ ИМААТ ДОСТОИНСТВЕНА ПЕНЗИЈА, ПОКАЖАВМЕ ДЕКА ГОЛЕМ РАСТ НА ПЕНЗИИТЕ Е МОЖЕН

Претседателот на СДСМ, Димитар Ковачевски, во рамки на денешната посета на Гевгелија, во Домот на културата се сретна и со Здружението на пензионери на Гевгелија. Претседателот Ковачевски на средбата посочи дека СДСМ прави се, за по пензионирањето секој да ужива во плодовите од својот работен век и од вложениот труд, и дека сработеното има видлив резултат.

Со новата методологија на пресметка на пезниите, која Владата предводена од СДСМ ја сработи заедно со пензионерите, пензионерите добиваат во просек 6.000 денари повеќе. Просечната пензија денес изнесува 20.195 денари што е за 6.400 денари повеќе во однос на 2016 година кога просечната пензија изнесувала нешто над 200 евра. Минималната пензија воедно, денес е за речиси 50% повисока од пензијата во 2016 година.

Претседателот Ковачевски се осврна и на фактот дека пензионерите беа опфатени и во пакетите со антикризни мерки , каде само во последниот 9-ти пакет, се издвоија 35 милиони евра за поддршка на 187.000 пензионери со што пензионерите добиваат од 1.500-3.000 денари месечно финансиска поддршка со цел полесно да ја пребродат зимата и кризата.

Поддршката за пензионерите од страна на СДСМ се огледа и во вложувањата во старинските домови. Моментално на територијата на државава има 5 државни старински домови, а преку проектот за подобрување на социјалните услуги на ресорното министерство во периодот кога Јована Тренчевска беше министерка, има отворено 5 центри за активно стареење во Чаир, Центар Жупа, Крива Паланка и Босилово.

Со новата програма за изборите на СДСМ, како што појасни претседателот Ковачевски на средбата, предвидени се повеќе мерки со кои ќе се обезбеди подобар животен стандард и достоинствена старот на пензионерите. Претседателот со пензионерите разговараше за можноста да се обезбеди енергетска сигурност за пензионерите во текот на зимските месеци како и за можноста за зимски регрес и воведување на пензионерска еднаквост — односно исплата на загарантирана минимална пензија на жените /мажите кои живеат со семејна пензија.

Пензионерите ја оценија како позитивна можноста за воведување систем за доброволно работно ангажирање на пензионерите што ќе придонесе за дополнително финансиско зајакнување на пензионерите, исто како и можноста за пензионерите на кои им недостигаат неколку години, да можат да остварат право на пензија

Претседателот Ковачевски порача дека со СДСМ пензионерите секогаш може да очекуваат партнерски однос и дека и понатаму ќе се работи заедно со пензионерите за да изнајде решение со кое сите пензионери ќе се над прагот на сиромаштијата или пак најсоодветно решение за минимална пензија.