ЗДРАВСТВО “ПОТОНАТО“ ВО ДОЛГОВИ, НА ДОЛЖНИЧКАТА ЛИСТА ИМА КЛИНИКИ, ПОЛИКЛИНИКИ, ИНСТИТУТИ СО ВКУПЕН ДОЛГ ОД 58 МИЛИОНИ ЕВРА, ДОДЕКА СИТЕ УСТАНОВИ ЗАЕДНО ДОЛЖАТ ПОВЕЌЕ ОД 100 МИЛИОНИ ЕВРА – МЕЃУ НИВ СЕ БОЛНИЦИТЕ ВО КУМАНОВО, ОХРИД, ПРИЛЕП, СТРУГА И СТРУМИЦА

Повеќе од 100 милиони евра должат здравствените установи во земјава. Со ови пари можат да се изградат четири нови болници. Ако на ова се додадат и недоспеаните обврски кои ги имаат институциите, македонското здравство должи близу 130 милиони евра или речиси третина нов клинички центар.

Најголем должник се заеднички служби на скопските клиники. Имаат доспеан долг од дури 19,3 милиони евра. Пред два дена министерот за здравство Фатмир Меџити призна дека не ја сака оваа установа, за која вели дека освен што трупа долгови, не знае што работи, па најави дека ќе ги разреши. Во првите 100 државни институции со најголем долг, 34 се здравствени установи. Од нив, 18 се скопски универзитетски клиники и заедничката служба, со вкупен долг од 58 милиони евра или повеќе од половина од целиот долг. Од нив, наголем должник е клиниката за радиотерапија и онкологија, која е 9 милиони евра во минус, а нови 6 само што не доспеале.

Неверојатни 16,5 милиони евра должи кичевската болница. Кога на ова ќе се додаде и недоспеаниот долг, оваа установа е во дупка близу 19 милиони евра, колку што должи целата заедничка служба на скопските клиники. За поранешниот директор на велешката болница Димитар Стровјаноски, несфатливо е како може една мала болница да направи толкави долгови. Тој вели дека менаџирањето со болницата е клучно дали таа ќе биде успешна или не.

Немањето интегритет, но и нестручноста на менаџерите е најголемиот проблем во македонското здравство смета Стровјаноски. Тој ја поздравува најавата на министерот скопските клиники да ги соедини во една институција, која ќе ја менаџира еден директор, при тоа укинувајќи ги економските менаџери.

Од скопските болници, најголем должник е 8 септември, со 4,1 милиони евра доспеан и 2,3 милиони евра недоспеан долг. Во големи долгови се и болниците во Куманово, Охрид, Прилеп, Струга и Струмица, но и клиничките болници во Штип и Битола, кои вкупно имаат 14,7 милиони евра доспеан и уште 2,4 милиони евра недоспеан долг.

Од Центрите за јавно здравје најзадолжен е кумановскиот, кој е во минус од 630 илјади евра доспеан и 130 илјади евра недоспеан долг. Реформите во здравството во последните 30 години, освен долгови, не дадоа резултат. Новиот министер, кој призна дека здравството е во катастрофална состојба, најавува енергична реформа и драстично намалување на долговите.