Градоначалникот на општина Куманово Максим Димитриевски и
претседателката на Управниот одбор на ХЕРА Румена Ѓердовска Којчески,
денеска во Здравствениот дом во Куманово го отворија првиот младински
центар „Сакам да знам“ во оваа општина.
Овој младински центар ќе нуди доверливи и бесплатни психолошки услуги за
младите, дистрибуција на информативни материјали за сексуално и
репродуктивно здравје, врснички едукации за сексуално и репродуктивно
здравје, како и простор за младински активизам за сите млади, а особено
за оние кои се социјално исклучени или маргинализирани.
Во изјава за медиумите, Димитриевски информираше дека Општина Куманово
позитивно ја има прифатено иницијативата од невладината организација
ХЕРА поради тоа што се работи за решавање на еден проблем во општеството
коешто како локална самоупава треба да се третира.
„Благодарност до Здравствениот Дом во Куманово кој отстапи простор за да
може да се одвива една ваква активност, секако благодарност и за
невладината организација ХЕРА која зема активно учество и имплементација
на овој проект. Ќе одиме чекор по чекор, првично Општина Куманово ќе
помогне во делот на надворешно уредување на просторот, организирано
чистење, бидејќи знаете овој простор подолг временски период е
запоставен и еве го враќаме повторно во одредена функција. Тука, младите
луѓе ќе имаат можност да ги добијат сите оние услуги кои ги опфаќа
проектот. И, ако нешто во минатото беше табу тема сметам дека треба
отворено да разговараме за сите овие отворени теми со кои се соочуваме
секојдневно и наши сограѓани со одредени проблеми. Општина Куманово веќе
има отворено Центар за млади или Младински центар, тоа е првиот во
државата. Дополнително, во општината одредивме одговорно лице за млади и
сега сме во фаза на отворање на Канцеларија за млади која ќе биде
лоцирана на ул. Доне Божинов во централното градско подрачје, каде
младите луѓе ќе добијат поголем број на информации и секако можности.
Конечно целта е младите луѓе да ги вклучиме во секојдневните општествени
процеси и да ги поттикнеме самите да носат одлуки на соодветно ниво.
Посакувам успех и среќа во имплементација на проектот и секако по
завршување на самиот проект и целосна имплементација ќе се обидеме како
општина во соработка со ресорните министерства да најдеме одржливост на
самиот проект“, посочи Димитриевски.
Претседателката на Управниот одбор на ХЕРА Румена Ѓердовска Којчески, во
изјава за медиумите истакна дека во анализите на ХЕРА увиделе дека има
потреба да се отвори уште еден младински центар кој ќе биде во Куманово,
поради тоа што многу млади луѓе од овој град оделе во Скопје за
здравствени услуги.
„На годишно ниво, околу 100 млади луѓе користат гинеколошки услуги преку
мобилната гинеколошка клиника, од нив преку 90% се припадници на
маргинализираните заедници што инјектираат дроги, меѓутоа и многу млади
луѓе од 24 години кои припаѓаат на рурални средини и кои немаат лесна
достапна можност од гинеколошки услуги. Со самото тоа, потребата се
наметна на младите да им обезбедиме еден простор каде ќе можат да
творат, да се активираат со нивните идеи во поглед на младински
политики. Соработката со Здравствениот дом, но и поддршката од локалната
самоуправа ни беше многу значајна за овој проект денеска да биде
реализиран. Голема благодарност до Здравствениот дом и локалната
самоуправа“, потенцираше Ѓердовска Којчески.
.gif)
.gif)
