БИТИЌИ : КОМПАНИИТЕ ВО СКОПСКИОТ РЕГИОН ГИ ПОДДРЖАВМЕ СО ЕДНА МИЛИЈАРДА И 200 МИЛИОНИ ДЕНАРИ ФИНАНСИСКА ПОДДРШКА ЗА ИНВЕСТИЦИИ

Само во Скопскиот регион, владата има исплатено околу 1 милијарда и 200 милиони денари финансиска помош за 181 компанија преку Законот за финансиска поддршка на инвестициите (ЗФПИ) изјави заменикот на претседателот на Владата на Република Северна Македонија, задолжен за економски прашања, координација на економските ресори и инвестиции, Фатмир Битиќи при денешната посета на компанијата „Нехо Исни“ од Скопје.

Во неговата изјава по обиколката на производствените капацитети за производство на сладолед, што  ова компанија успешно го прави од 2012-та година, како еден од двата единствени производители на македонскиот пазар, вицепремиерот Битиќи изјави дека компанијата Нехо Исни беше поддржана од Владата каде исплатената помош за „Поддршка за пораст на капитални инвестиции“ и „Поддршка за зголемување на конкурентност на пазарот“, изнесуваше над 6 милиони и триста илјади денари.

„Во оваа прилика сакам да нагласам дека компанијата суровините за производство на сладоледот ги купува исклучиво од домашните компании, при што над 70% од производството е наменето за регионалниот и европскиот пазар, а останатиот дел се пласира на домашниот пазар. Поддржувајќи ги компаниите кои користат домашни суровини ние ја промовираме одржливоста и зајакнувањето на домашната економија, бидејќи преку овој пристап се поддржуваат локалните фармери, производители и добавувачи. Ова активно придонесува за отворање нови работни места и економски раст“, изјави Битиќи.

Вицепремиерот Битиќи информираше дека финансиската помош на Владата за „Нехо Исни“, резултираше со 40 нови вработувања.

„Денес компанијата Нехо Исни вработува 90 лица, од кои 40-тина вработувања се креирани за времетраење на инвестицискиот проект од 2018 до 2022 година. Нашата стратегија преку законот за финансиска поддршка на домашните компании  е да ги идентификуваме секторите кои можат да имаат додадена вредност за да бидат поконкурентни не само на домашниот пазар туку и во странските пазари“, изјави Битиќи.

Вицепремиерот Битиќи посочи дека Планот за економски раст поставен во 2017 година, потврдува дека оваа Влада го знае вистинскиот пат за економски раст и развој на нашата земја.

 „Само во Скопскиот Регион поддржани се 181 компании кои до денес имаат добиено околу 1 милијарда и 200 милиони денари финансиска помош за нивните инвестициски циклуси, кои креираа нови работни места за нашите граѓани“, изјави Битиќи.

Менаџерот на компанијата, Орхан Шаќири, се заблагодари на Владата за финансиската помош за која рече дека за нив е од особено значење во делот на проширување на капацитетите и нови вработувања, и ги охрабри компаниите да влегуваат во нови инвестициски циклуси кои ќе резултираат со нови работни места.