Ад хок телото за регулација на медиумите во предизборниот период нема да се состанува до 23 август, до кога треба да биде познат и петтиот член – Албанец, брифираат од таму. Моментно трае јавниот повик, а сите заинтересирани можат да се пријават до недела (21 август).
Цветин Чилиманов, член на ова тело на предлог на ВМРО-ДПМНЕ, вели дека не се предвидени никакви состаноци денеска и наредните денови.
– Се чека да се избере петиот член, за да може да почнеме со работа. Последниот член ќе го избереме ние со консензус од кандидатите кои се пријавиле на јавниот повик – вели Чилиманов.
Љубомир Костовски, член на телото по предлог на СДСМ, исто така вели дека не можат да работат се додека не се донесе конечна одлука за избори.
– Според договорот политичките партии треба да се сретнат уште еднаш и да кажат дека се исполнети условите за фер и демократски избори. Дури потоа ќе може да почнеме со работа – вели Костовски.
На краткиот состанок со директорот на Агенцијата, Зоран Трајчевски тие се договориле да се изготви оглас за избор на петиот член, кој е веќе објавен на страницата на АВМУ.
Иаку, Љубомир Костовски, Цветин Чилиманов и Слаѓана Димишкова вчера беа на состанокот, додека Горан Трпеноски се уште е на годишен одмор.
Сите пет члена треба да се комплетни до 23 август.
Ад хок телото требаше да биде формирано до 19 август, но поради тоа што измените на Изборниот законик и Законот за медиуми беа објавени во службен весник со задоцнување од четири дена, за толку дена се пролонгира и неговото формирање.
Извор: Мета