Столтенберг зборувал со Заев по телефон: Со нетрпение ја очекуваме Северна Македонија во НАТО

0
1011

–Генералниот секретар на НАТО, Јенс Столтенберг на Твитер објави дека телефонски разговарал со премиерот Зоран Заев со цел да ја реафирмира посветеноста на Алијансата на членството на Северна Македонија.

– Добар телефонски разговор со премиерот Зоран Заев за реафирмирање на посветеноста на НАТО на членството на Северна Македонија. Процесот на ратификација е во тек и со нетрпение очекуваме Северна Македонија наскоро да и се приклучи на нашата Алијанса, објави Столтенберг.

Од кабинетот на премиерот соопштија:

Претседателот на Владата на Република Северна Македонија, Зоран Заев и Генералниот секретар на НАТО, Јенс Столтенберг во телефонски разговор разменија мислења за одлуката на ЕУ да го одложи стартот за преговори на нашата земја за членство во унијата.

Премиерот Заев му го пренесе на Генералниот секретар Столтенберг расположението на граѓаните на земјата од историската грешка на ЕУ да не ги одобри очекуваните преговори за пристапување во полноправно членство како разочарувачко и фрустрирачко, наспроти фактот дека Република Северна Македонија ги исполни сите услови.

Тоа не треба и нема да влијае и на остварувањето на втората од двете најголеми стратешки цели на државата – членството во ЕУ, и од спроведувањето на реформите до крај за да ги имплементираме европските вредности во сите наши институции, во сите пори на нашето живеење, истакнал во разговорот со Столтенберг претседателот на Владата на Северна Македонија Заев.

Во телефонскиот разговор со Столтенберг, премиерот Заев се заблагодари за поддршката на НАТО во нашите евро-атлантски интеграции и истакна дека Северна Македонија останува посветена на заокружувањето на процесот за полноправно членство во алијансата, како нејзин стратегиски и суверен избор да биде следната, 30-та земја членка.

Премиерот Заев го информираше Генералниот секретар на НАТО за резултатите од лидерската средба кај претседателот Пендаровски, и за заеднички договорената согласност за организирање предвремени избори на 12 април идната година.