42 подмладоци на политичките партии денес ја потпишаа Декларацијата за слободни, фер и демократски избори и против говор на омраза во организација на Институт Охрид, од Скопје. Со потпишување на Декларацијата, младите политичари се заложија дека ќе се борат против говорот на омраза и негово отстранување на социјалните мрежи и секојдневниот живот. Истовремено, младите политичари го искажаа својот став во насока на поддршка за фер, слободни и демократски избори. Беа испратени пораки за предизборен фер плеј, како и апел за младите да бидат повеќе во фокусот на изборите, медиумите и општеството.
„Партиските подмладоци се многу важен сегмент во организирањето и имплементирањето на изборите и се од исклучителна важност бидејќи во себе вклучуваат огромен број млади и со своето однесување за време на изборните кампањи директно влијаат врз однесувањето на голем процент на граѓани во државата. Со оглед на тоа дека ова е седмо потпишување на Декларацијата, слободно можам да кажам дека политичките подмладоци од сите партии се и повеќе од свесни за својата општествена одговорност, како и нивната улога во целиот изборен процес“- изјави Билјана Јанева, извршна директорка на Институт Охрид.
Чинот на потпишување на Декларацијата е традиционален настан кој се одржува пред секои избори од 2014 година. Оваа година, свечено обраќање имаше и претседателот на Државната изборна комисија. Александар Даштевски, кој им честиташе на подмладоците за нивната зрелост.