Обезбедени се сите потребни средства, околу 70 милиони евра, за изградбата на експресниот пат Прилеп-Градско. Сега се гради делницата од Фаришката до Дреновската Клисура, изјави министерот за транспорт и врски, Горан Сугарески, кој денеска беше дел од владината делегација за чествување на делото на Блаже Конески во Небрегово.
– Пред десетина дена го потпишавме договорот со Европската Унија за финансирање на вториот дел од експресниот пат, конкретно делницата од Градско до Дреново. Тоа е грант од 35,4 милиони евра преку ИПА-програмата. Избрана е градежната компанија која ќе ја гради делницата и очекувам до почетокот на ноември годинава да започнат градежните работи на оваа делница долга 15 километри за што рокот е до 2019 година – рече Сугарески.
Како што потенцира, моментно се работи на делницата од Фаришката до Дреновската Клисура, која чини 31,8 милион евра. За третата фаза од Тројаци до Плетвар, вклучувајќи го и влезот во Прилеп, се обезбедени шест милиони евра грант од Европската Унија.
Сите три фази за изградбата на патот чинат околу 70 милиони евра.
Како што најави Сугарески, патот треба да биде готов кон крајот на 2019 и почетокот на 2020 година.
.gif)
.gif)
