ДУИ МОЖЕ ДА КАЖЕ КАКО Е СО СДСМ ДА СЕ ГЛАСА ЗА НАПРЕДОК, А КАКО СО ВМРО ДА СЕ ГЛАСА ЗА СПОМЕНИЦИ, ВЕЛИ КОВАЧЕВСКИ

Како изгледа Македонија како напредува во НАТО интеграциите и ЕУ интеграциите со СДСМ и како изгледа Македонија во антиквизација бидејќи беа дел од коалиција со ВМРО – ДПМНЕ може да видат граѓаните, а може да каже и ДУИ бидејќи тие беа дел од Владата, рече претседателот на СДСМ, Димитар Ковачевски во интервју за Алсат М Телевизија.

-И можат да ја видат точно разликата како изгледа да седите во Влада и да гласате за инвестициски планови во кои има купишта споменици на плоштадот во Скопје, жални врби во Вардар, лажен барок итн. Кавги со соседите, меѓуетнички тензии во општеството. И да видат разлика со тоа како изгледа една влада во која се гласа за членство во НАТО, во која се гласа за отпочнување на преговори со ЕУ, во која што се склучуваат договори со соседите и впрочем да бидат во Влада која во последните 7 години, ќе признаете и вие и многу други, нема никакви меѓуетнички тензии во општеството. Погледнете ги вестите само дека во првите 10 вести никогаш во последните 7 години такви теми нема, рече претседателот на СДСМ, Димитар Ковачевски.