Претставниците на Форумот за демократска Македонија во Малта објавуваат дека нивните претставници, познатиот новинар Игор Филевски, Живанка Витанова и Стево Ѓоргиев, вчера се сретнале со премиерот на Република Македонија, Зоран Заев, за време на неговата дводневна посета на оваа држава.
Како организација на иселениците што се залага Македонија да биде демократска и правна држава, претставниците на ФДМ, изразиле поддршка на Владата за решавање на спорот за името со Грција и напорите за интеграција во НАТО и ЕУ.
На средбата биле упатени и забелешки за дел од кадровските решенија, на дипломатскиот дисконтинуитет во одредени земји со непоставувањето на амбасадори, на несоодветната родова застапеност на функциите, како и „нерешените судбини на свиркачите“ кои придонесоа за демократизација на Република Македонија и создавање услови за нов демократски процес во чекорењето кон правна држава.
Македонскиот премиер Зоран Заев напоменал дека Владата секогаш ќе биде отворена за секоја конструктивна критика и ќе дејствува во подобрување на нејзината работа.
Премиерот Заев објаснил за проблемите со кои се соочува Владата при реализирање на родовата еднаквост на функциите и настојувањето тој сегмент да биде подобрен во следниот период, па се` до начинот на кој ќе се решат испразнетите амбасадорски места.
Заев напоменал дека Вршители на должност ќе бидат поставени во сите административни центри каде се чека нов амбасадори се додека не се реализира процесот што не може да добие своја разрешница без согласност од Претседателот на Република Македонија Ѓорге Иванов.
Во Малта наскоро ќе биде отворено конзуларно оделение, поради се` поголемиот број работници што доаѓаат за работа во оваа островска држава.
Што се однесува до прашањето за „свиркачите“ Премиерот Заев изјавил дека Владата прави се` за нивно згрижување за да го пребродат вакуум просторот создаден поради правните ситуации во кои се затекнати.
ФДМ најавува дека и натаму ќе бара решение од Владата поради суштинската улога на „свиркачите“ во откривањето на корупцијата и злоупотребите на функциите од позиција на моќ.
По прашањето за решавањето на проблемот со Грција и евентуалниот Референдум, Премиерот Заев ја образложил реалната и правната ситуација во однос на гласањето во дијаспора, од условите кои ги имаат иселениците за гласање според Уставот и Законите во овој момент, до опцијата за подобрување на можностите за правото на глас на иселениците.
Во понатамошниот дел од средбата по предлог од ФДМ биле предложени следни средби со Малтежани кои имаат влијание во туристичкиот бизнис и севкупната економија на островот, а претставници на македонската влада би можеле да ги информираат за можностите за инвестирање на релација Малта-Македонија.
Премиерот Зоран Заев рекол дека иселениците недвојбено се сметаат за важен фактор како за економијата и инвестициите во Македонија, така и за конструктивната критика која ја упатуваат со цел подобрување на администрирањето и функционалноста на македонската влада.
Втората работна средба со Премиерот е закажана за денес попладне, по неговата средба со Премиерот на Малта и Претседателката на државата. На втората средба ќе бидат присутни и други претставници на здруженија кои се застапени на островот.
.gif)
.gif)
