СДСМ: Ако не пријавил пиштол, што се друго не пријавува Мијалков кога ја напушта земјава?

„Ова е нов скандал, по серијата скандали од кои што последен беше со дипломатскиот пасош на Мијалков“, реагираат од опозициската СДСМ во врска со информацијата дека поранешниот директор на Управата за безбедност и контраразузнавање (УБК), Сашол Мијалков бил приведен на белградскиот аеродром „Никола Тесла“ откако му бил најден пиштол во патната торба.

Од СДСМ прашуваат: Како Мијалков успеал да ја помине контролата на аеродромот во Скопје и кој дозволил тој да помине без да биде проверено што носи?

„Кој ќе преземе одговорност што непријавен пиштол бил дозволен во авион? Кој ја гарантира безбедноста на авионскиот сообраќај? Дополнително, овој скандал отвора прашање што друго носи во своите куфери Сашо Мијалков кои очигледно поминуваат непроверени во Македонија. Ако не пријавил пиштол што се друго не пријавува Сашо Мијалков кога ја напушта земјава?“, стои во соопштението од СДСМ.

Од најголемата опозициска партија велат дека овие настани уште еднаш ја потврдуваат потребата од темелна реконструкција на државниот систем и институциите во Македонија“.

„Едно е јасно. Се стеснува кругот околу Сашо Мијалков. Од одговорност бегање нема, каде и да оди“, велат од СДСМ