Фото : Notebookcheck
Новите преклопни телефони на Motorola, Razr 60 и Razr 60 Ultra, ќе бидат претставени на 24 април. Посилната верзија конечно треба да добие вистински флегшип процесор, а наводно ќе има и опција со 2 TB меморија.
Претставувањето на новите преклопни телефони на Motorola е практично пред врата. Компанијата потврди на X дека премиерата на Razr 60 и Razr 60 Ultra ќе се одржи во втората половина од месецот, поточно на 24 април.
„Кога обичното се претвора (flips) во невообичаено“, напиша Motorola на X, заедно со промотивно видео кое прилично скромно ги прикажува нивните нови преклопни телефони.
Иако сè уште ништо не е официјално потврдено, информации од различни извори наведуваат дека Razr 60 Ultra ќе користи Qualcomm Snapdragon 8 Elite. Од друга страна, Razr 60 треба да користи нешто послаб MediaTek Dimensity 7400X, што секако ќе се одрази и на нешто пониската цена во споредба со Ultra.
Се шпекулира дека двата модели ќе имаат батерија со капацитет од 4.500 mAh и до 18 GB RAM. Обичниот Razr 60 би имал максимум 1 TB вградена меморија, додека Razr 60 Ultra наводно ќе оди до дури 2 TB. Доколку оваа последна информација се покаже како точна, тоа би значело дека претстојниот Ultra на Motorola ќе биде првиот телефон во светот со 2 TB меморија.
Како и кај претходните генерации, Razr 60 ќе има помал надворешен екран во споредба со Ultra. Внатрешниот преклопен екран на Ultra ќе биде со дијагонала од 6,96 инчи, додека надворешниот ќе биде 4 инчи. Ultra исто така треба да има три камери од по 50 мегапиксели, вклучувајќи ја и предната камера сместена во отворот на преклопниот екран.
