Пред претседателот на Република Северна Македонија, Стево Пендаровски, во Домот на Армијата во Скопје беше презентирана состојбата на борбената подготвеност на Армијата на Република Северна Македонија во тековната година.
Претседателот и врховен командант Стево Пендаровски искажа задоволство од професионалноста, посветеноста и покажаната пожртвуваност на припадниците на Армијата во справувањето со пандемијата и пожарите низ земјата.
Пендаровски рече дека инвестирањето во модернизирањето и опремувањето на Армијата мора да продолжи, со јакнење на нашите одбранбени капацитети и потенцијалите на Армијата.
“Независно што здравствената и енергетската криза притискаат за поинаков распоред на буџетските приоритети, државата е неопходно да остане посветена на вложувањата во одбраната и безбедноста, затоа што тие се основата за функционирање и на други општествени сектори” – рече претседателот Пендаровски.