Barcelona Gipsy Balkan Orchestra повторно доаѓа во Скопје. Солистичкиот концерт на еден од најиновативните бендови од поновата генерација, оркестарот чија музика допира директно до срцата е закажан на 28-ми февруари 2025 во Македонската филхармонија.
Barcelona Gipsy Balkan Orchestra во годината пред нас полни 13 години музицирање на сцената, творештво и интерпретација на уникатен звук кој ги заробува срцата и умовите на публиката ширум светот. За нив не постојат граници, апсолутно никакви, а нивната музика инспирирана од различни музички традиции од Балканот, но и светот е емотивно патување кое ветува уникатно и автентично искуство, какво што нѐ очекува уште еднаш (по она во 2022 година) – на 28 февруари следната 2025 година.
Сицилијанската пејачка Маргерита Абита, која на членовите на Barcelona Gipsy BalKan Orchestra (БГКО) им се придружи во ноември 2019 година и донесе нови вкусови, свежа енергија и нова суштина во оркестарот, што зад себе има 7 студиски албуми, настапи во повеќе од 40 земји и лојална база на фанови на BGKO YouTube каналот, во Скопје доаѓа придружувана од Иван Ковачевиќ (контрабас, Србија), Алберт Енкаминанко (перкусии, Шпанија), Жулиен Шанал (гитара, Франција), Чави Пендон (кларинет, Шпанија), Олександр Сора (виолина, Украина) и Фернандо Салинас (хармоника, Шпанија).
Barcelona Gipsy Balkan Orchestra е меѓународна формација од која произлегуваат најдобрите аранжмани, каде што секој инструмент има свое место и простор. Текстурите и тембрите се фино измешани во служба на секоја песна, од евоцирање емоции до френетичен транс ритам, а интересно е дека на нивниот репертоар свое место имаат и неповторливите „Море сокол пие“, „Македонско девојче“, „Kaleja Jaca“, ведрата и танцувачка румба на Есма Реџепова-Теодосиевска…
Приказната не завршува тука, ниту нивната музичка и творечка ниту делот кој допрва треба да го испишат заедно со македонската публика. Затоа на 28 февруари – денот резервиран за уникатно музичко патување со неверојатната музичка формација која освојува на прва – бидете во Македонската филхармонија, бидете дел од незаборавната вечер која ќе ги освои и наполни срцата и на најпребирливите музички сладокусци.
Влезниците за овој концерт веќе се пуштени во продажба по цена од 1000, 1200 и 1500 денари, и тоа прекупродажната мрежа на mktickets.mk (Barcelona Gipsy Balkan Orchestra – MKTickets).
Извор : Музика24.МК
