ФРЧКОСКИ ВО СВОЈ СТИЛ: Иванов беше лубрикант на режимот и се обидувал глупаво да му помогне

Универзитетскиот професор Љубомир Фрчкоски во гостување на Телевизија 24 објасни зошто очекува дека нема да пропаднат предметите за обвинетите од СЈО, меѓу кои Сашо Мијалков, Гордана Јанкулоска и други, по нивните тужби пред судот во Стразбир.

„Ова што се случи е лажна вест и соодветно е што тоа институциите го демантираат. Таму постои еден клучен проблем поради кој според мене таа постапка пред судот ќе заврши негативно за подносителите, односно за поранешниот претседател Иванов“, рече Фрчкоски.

Прашан дали за постапката пред судот во Стразбур која ја поднесоа адвокатите на обвинетите во предметите на СЈО, самото тоа што судот ја прифати и почна постапката е некоја индиција, професорот Фрчкоски рече дека во судот тие мора да формираат претходни комисии кои ја оценуваат процедуралната исправност на постапката. Според него, тие имаат неколку случаи околу аболиции во некои други случаи кои ги имаат пресудено, така што имаат некаква традиција околу тоа, и тие веројатно ќе влезат во проценка на иницијативата, и тука не може да се очекува некое спектакуларно одбивање, ќе ни пратат нас можност да одговориме. Владата сега треба да биде концентрирана на тој одговор на прифатената иницијатива, и потоа ќе одлучат.

„Она што ќе биде различно од другите прифатени иницијативи се нашите карактеристики околу тоа како се има тоа случено. Тоа е всушност битното во целата приказна. Имено, бидејќи Иванов е лубрикант на тој режим, се обидувал да му помогне и тоа се обидувал глупаво да го направи, и практично излегол од своите надлежности. Тоа е основната точка на одбрана на државата пред оваа иницијатива. Тој излегол од своите надлежности и наместо да направи помилувања кои Уставот му ги дава во надлежност, тој де факто направил амнестија, направил всушност ултравирасакт, излегол надвор од своите надлежности и актите кои ги направил се ништавни. На тоа се повикуваарт нашите институции“, објасни Фрчкоски.

Појаснува дека нему му се дозволувало согласно уставниот член помилување во согласност со закон.

„Тоа значи конкретен акт на корекција на правдата што ја има претседателот во рака, тоа значи дека тој морал да ги помилува еден по еден сите посебно, притоа требало Министерството за правда да подготви таква постапка и тој да ги помилува, но таа постапка тој не ја водел, туку генерално ги помилувал сите. Практично за сите постапки кои се водат во СЈО, тој се обидел да ги разреши со еден генерален акт. Тука е грешката, не направил помилување што го има во надлежност“, објасни Фрчкоски.