ПРОДОЛЖУВА ХАЈКАТА НА МЕДИУМИТЕ БЛИСКИ ДО ВМРО ДПМНЕ КОН НАШИОТ НАЈДОБАР ФУДБАЛЕР: Не е точно дека имам 7 милиони евра заглавени во Еуростандард Банка, посакувам оштетените да си ги вратат парите!

0
919

Скопјанец имал заштеда од 7 милиони евра во Еуростандард банка, и се избезумил кога ја слушнал веста дека банката пропаднала, а со тоа и неговата заштеда, па цел ден обезбедувањето не можело да го тргне од таму – вест која пред три недели се објави првин во еден македонски портал, а потоа ја пренесоа и десетици други. Во тек на вчерашниот ден пак, без да биде наведен конкретен извор, десетици медиуми објавија дека несреќниот штедач е поранешен спортист, а сега угостител. Според описот на ликот, не е тешко да се претпостави дека станува збор за познатиот фудбалер Дарко Панчев, и покрај тоа што не се објавени неговото име и презиме.

Во телефонски разговор за ,,Фокус” Панчев и неговата сопруга, поп пејачката Маја Панчева, велат дека и самите се изненадени од веста , која стана топ тема, но и од наивноста на читателите кога станува збор за медиумите.

-Во минатото, се знаеше што се објавува, точни и проверени вести, извор на информацијата, луѓето можеа да веруваат на она што се пласира во медиумите. Денес, очигледно, секој може да пишува и објавува што сака, без доказ, без факти, па дури се објавуваат и непотпишани текстови. Да не должам многу, јас не сум несреќниот штедач, значи немам седум милиони евра во банка. Жал ми е за сите кои штеделе во банката која замина во стечај, и навистина не знам како некој може да се сити на нечија мака, па и да пласира невистини поврзани со темава- вели Панчев. Тој додава дека не е прв пат да прочита дезинформации за него, и апелира да се стави ред во медиумите.

-Не може тоа така, да се пласираат лаги, а да се нема одговорност. Луѓето читаат, а многумина од читателите не ни гледаат кој е потпишан под тој текст, дали медиумот кој што објавил законски функционира и работи според новинарската етика за точно известување. Од описот објавен за штедачот, јасно е дека многумина донеле заклучок дека се работи за мене, што е апсолутна невистина. Разочаран сум, се надевам дека во медиумскиот простор ќе се стави ред, бидејќи неретко со вакви објави се нанесува штета на лицата за кои директно или индиректно се пишува – ни изјави спортистот кој зад себе има завидна кариера и низа на титули од времето кога беше активен на фудбалските терени.