Опозицијата ја напушти седницата на Собранието, нема да гласаат за предизборно вдомување на партиски војници

Откако не помина предлогот на опозицијата за симнување на точките од дневниот ред кои се однесуваат за именување на функционери, нејзините пратеници ја напуштија салата и рекоа дека нема да гласаат за предизборно вдомување на партиски војници.

-ВМРО-ДПМНЕ и ДУИ сакаат да продолжи да вдомува партиски војници пред изборите. Сите тие сами да си ги гласате. Соберете 62 гласа и гласајте. Од нас поддршка нема да добиете, рече Горан Сугарески, координатор на СДСМ.

Тој рече и дека ВМРО-ДПМНЕ со тоа што го условила распуштањето на Собранието со донесување на Буџетот, всушност покажала дека бега од избори.

Сакате да избегате од избори. Предлогот на опозицијата е јасен, без никакви условувања. ВМРО-ДПМНЕ и ДУИ го лажат народот дека со недонесување на буџетот нема да има пензии, плати и друго, рече Сугарески.

Илија Димовски од ВМРО-ДПМНЕ возврати дека СДСМ се тие што веќе две години бегаат од избори со разни оправдувања.