Тој нагласи дека во 21 век во Европа, прашањето на мајчиниот јазик не смее да биде во судир со напредокот на државата кон членство.

„Не, доколку Европа е континент каде што се почитува културната и јазична шареноликост, како што стои во Лисабонскиот договор. Кој сум јас и каков јазик зборувам не се прашања на кои може да се дозволи кој било друг да има право на збор. Тоа е лично мое прашање. Во една демократија, твојата држава не може да ти каже како се чувствуваш, а камоли некоја друга земја или организација“, порача Димитров.

Вицепремиерот истакна дека секој компромис доаѓа со политичка цена што се плаќа дома, но оти мислата-водилка на вистинските лидери не се идните избори, туку идните генерации. Токму затоа, истакна Димитров, компромисите направени од страна на Северна Македонија, значат заземање на вистинското место во историјата, но газење врз правото на самоопределување во ниеден случај не може да биде дел од компромис, оти е спротивно на самата европска идеја:

„Затоа апелирам за одговорност и лидерство во Европа. Западниот Балкан е составен дел на Европа, без европската перспектива е како соба во куќата што е отсечена од домаќинството и затоа пристапувањето во ЕУ е задача на регионот, но и задача на ЕУ и подразбира заемна одговорност. Европското неисполнување на ветувањата кон регионот го урива кредибилитетот на Унијата, а со тоа удира кон прогресивните сили, се дава сила на националистите, а довербата на граѓаните опаѓа. Европа не смее да си дозволи да го изгуби регионот бидејќи единствената одржлива визија за иднината на овие земји е европската“, нагласи македонскиот вицепремиер во Стразбур.

Војните од деведесеттите години на Балканот се цивилизациски пораз за нашиот континент. Живееме во време кога темелите на светскиот поредок се разнишани и непредвидливи, регионот е место на судир на различни геополитички сили, рече тој и додаде дека. Европа треба да размисли дали повеќе ќе ја чини инвестицијата во интеграција на Западниот Балкан или цената што ќе се плати со изоставување на регионот.

Говорниците, како што сооопшти кабинетот на Димитров, упатија пораки со полна поддршка за македонската европска интеграција:

„Вие направивте сѐ што треба. Северна Македонија заслужува преговори веднаш“, порача Џорџ Катругалос.

„Апелирам до Бугарија да престане со блокадата. Штетата е огромна“, рече Литванката Лаима Андрикеине.

На прашањето упатено од бугарската пратеничка Екатерина Захариева за мерките што ги презема Македонија за справување со случаите на дискриминација и говор на омраза против граѓаните што се изјаснуваат како Бугари, Димитров одговори:

„Кај нас нема ниту еден единствен пријавен случај за дискриминација врз основа на бугарска националност. Ниту една официјална жалба. Оттука, тешко ми е да разберам дали ваквите обвинувања ви се дел од домашна политичка битка или се резултат на некаков меур во којшто сте и навистина верувате дека се врши некаква дискриминација. Северна Македонија е мултиетничка држава и за разлика од други земји од регионот, кај нас малцинствата се апсолутно признати со гарантирано право на еднаквост и на самоопределување.

Што се однесува до говорот на омраза, одговорно тврдам дека од страна на официјални државни претставници нема такви случаи. Се разбира дека осудуваме инциденти со говор на омраза, но треба да имате предвид дека кога на некој народ се обидувате да му го оспорите јазикот и правото на самоопределување, очекувано е да има револт. Вашата политика е инвестиција во антагонизам, а не во пријателство.“

Димитров притоа повика Бугарија да се вклучи во неодамнешната иницијатива на Советот на Европа – Опсерваторијата за учење на историјата, каде што засега не учествува:

„Еве можност да работиме заедно и да градиме продуктивна атмосфера, да учиме од компаративните европски искуства за надминување на прашањата што се однесуваат на историскиот наратив“, нагласи Димитров.