Откако лидерот на ВМРО-ДПМНЕ Христијан Мицкоски, даде изјава околу иницијаторите кои бараат вонреден конгрес за избор на нов претседател на партијата, и рече дека нема намера да поднесува оставка, стигна реакција и од иницијативниот одбор.
„Најпрвин го поздравуваме потегот што претседателот Христијан Мицкоски, реши да го прекине молкот и неговото исчезнување и криење од јавноста.
Жалиме што денес, после исполнувањето на вториот услов за оставка – неформирање влада, не собра храброст и демократски капацитет да ја понуди својата оставка пред членството на партијата. Членството најдобро знае дека единствен виновник што Зоран Заев по втор пат стана премиер е Христијан Мицкоски.
Додека “шпицен” кандидатот вчера го мачела дилемата дали да ја гледа синоќешната собраниска седница со пуканки или со чипс пред телевизор, членството на ВМРО-ДПМНЕ не може да се смири додека не најде одговор на прашањето “како можеше да се испушти ваква шанса”.
Одговорот е јасен. Човек што нема храброст да заземе став по ниедно прашање, човек што се крие на денот на избори и не им се заблагодарува на оние кои трчале за него, нема капацитет да го води ВМРО ДПМНЕ.
Претседателот Мицкоски пред изборите тврдеше дека според навигацијата што ја имал и релевантните анкети, ВМРО-ДПМНЕ има огромна предност пред СДСМ. На изборите се виде дека или лажел, или немал харизма за да ја материјализира таа предност или едноставно се договорил и му ја подарил победата на Зоран Заев.
Што и да е, подеднакво е лошо и недозволиво за лидер на ВМРО-ДПМНЕ.
Затоа одговорност и вонреден конгрес мора да има. Најпосакувано сценарио на Зоран Заев е Мицкоски да продолжи да ја води партијата во нови порази и после секој пораз да прогласува победи и да наоѓа оправдувања за пропустите.
Тоа не е опција ни за членството , ни за Македонија. Потребно е силно и обединето ВМРО-ДПМНЕ, кое ќе биде сериозна алтернатива и ќе го совлада Заев“, се вели во соопштението.
.gif)
.gif)
