Заев за Н1: Три автобуси од Ниш вчера пристигнаа во „Сити Мол“, луѓето си доаѓаат на шопинг во Скопје, ама си носат маски

0
739

Верувам дека Балканот веќе не е темпирана бомба, туку станува европски Балкан каде што се градат мостови на пријателство и се наоѓаат решенија преку дијалог и соработка. Убеден сум дека дури и оние решенија кои сè уште не се пронајдени, ќе се најдат со дијалог, изјави премиерот Зоран Заев во синоќешното интервју за телевизија Н1.

Прашан за идејата за обединување на Косово и Албанија, тој смета дека не е добра, и оти заедничката иднина на сите земји од регионот е во ЕУ.

– Европа без граници, Европа каде што луѓето работат, соработуваат и комуницираат едни со други. Убеден сум дека овие идеи се идеи на поединци, дека тие се во малцинство и нема да имаат своја иднина затоа што верувам дека подобрувањето на соработката во нашиот регион е дел од нас – изјави Заев.

Говорејќи за Мини Шенген, тој посочи дека тоа ќе им користи на сите и ќе ја унапреди регионалната соработка.

– Ако Македонец може да аплицира за работа во Ниш или Нови Сад, исто како Србин, или обратно Србин може да се пријави за работа во Струмица или Скопје, ако нашата меѓусебна размена на производи навистина го забрза процесот на граничните премини, ако овозможиме признавање на дипломите со што граѓаните ќе можат уште полесно да најдат вработување, ако можеме да им кажеме на странските инвеститори дека за нивната инвестиција во Врање или Ниш, ако им требаат дополнителни инженери, можат да ги најдат во Скопје и да ги вработат, сето ова ќе им користи на сите – рече премиерот на Северна Македонија.

Тој се надева дека Мини Шенген ќе предизвика сериозно внимание и кај новата косовска влада, но и во Црна Гора и БиХ, бидејќи на тој начин регионот како целина ќе се придвижи многу побрзо кон ЕУ.

Во врска со односите меѓу Белград и Скопје, имајќи го предвид фактот дека Србија донираше неколку илјади вакцини за Македонија, но и проблемите кои ги имаше во минатото, Заев кажа дека соработката постојано се подобрува и се унапредува.

– Српскиот и македонскиот народ отсекогаш биле големи пријатели и браќа, повеќето од нив се православни христијани, имаме одлична соработка. Во минатото имавме одредени драми кои се случуваа за време на промената на владата кон средината на 2017 година, бидејќи во нашата земја се одвиваше процес на големо прислушување – рече Заев, додавајќи дека штом ја презеде функцијата во нова влада, тој го реши проблемот со Вучиќ и оттогаш тие имаат соработка која постојано се унапредува.

Тој додаде дека во Македонија, пред неколку месеци е донесена одлука да се врати српскиот јазик како изборен од 3 до 6 одделение, и дека се прават подготовки тоа да се направи и во повисоките одделенија.

– Последниот чин на братска љубов што го покажа српскиот народ е да донира повеќе од 8.000 вакцини кога има недостиг на вакцини насекаде во светот и кога Србија нема доволно, тоа е навистина огромен чин на пријателство што јас и нашиот народ нема да го заборавиме – рече Заев.

На прашањето дали спорот меѓу МПЦ и СПЦ може да влијае на односите со Србија, Заев потврди дека од Вселенскиот патријарх побарал независност на МПЦ, но оти тоа прашање го покренал и во честитката испратена до новоизбраниот за српски патријарх Порфириј.

– Верувам дека можеме да најдеме решение… Гледаме надеж преку дијалог помеѓу СПЦ и МПЦ со цел да се признае автокефалноста на МПЦ. Српската православна црква опстојува во Северна Македонија, граѓани одат во српските храмови. Подготвени сме да ја почитуваме верската определба на граѓаните, го почитуваме и секуларниот карактер на Србија и Северна Македонија… Политичарите се тука за да создадат услови за епископите да постигнат решение – вели Заев.

Во интервјуото, тој говори и за корона-кризата и можните ограничувања во патувањата. За тоа дали владата во Скопје размислува како патниците од Србија ќе поминуваат низ Северна Макеоднија во текот на летото, со оглед на состојбата со коронавирусот, Заев рече дека дури и кога имаше најголеми бројки на заразени, границите кон Србија беа отворени кон Србија, со исклучот на забраната од 20 кога се појави британскиот сој.

– Вчера имавме три автобуси во Сити мол тука од Ниш, тие дојдоа да купуваат со маски затоа што не можеа во Србија поради мерките – рече Заев, додавајќи дека ќе се најдат најфлекисбилните решенија за српските граѓани да доаѓаат и минуваат низ Македонија, а и македонските граѓани да одат во Србија.