Шините од единствениот километар пруга што од Битола се изгради кон Грција на делови фаќаат корозија, а низ нив не ни помина воз. Трасата за останатите 16 километри железничка пруга која не се изгради, полна е со бари и кал. На терен нема работници, туку само расфрлен и неискористен чакал. Битолчаните кои ги затекнавме како минуваат низ старата индустриска зона до каде што стигнаа шините велат дека една година не виделе работници на терен, пишува СДК.
За два месеца ќе се наврши една година откако запреа градежните работи на железничката пруга од Битола за Кременица и грчка граница. Еден од главните предизборни проекти на ВМРО-ДПМНЕ во Битола, железничко поврзување со соседна Грција, заврши неславно. Пругата требаше да биде готова до 30 јули минатата година и еден крак да минува низ индустриската зона „Жабени“ за да носи производи и суровини кон Грција. Од 17 предвидени километри, се изгради само еден.
„Дел од фирмите тужевме во домашните судови, а некои поднесоа тужби и во Бугарија. Кај нас се одржа едно рочиште и на него не се појави никој од конзорциумот“, велат дел од работниците.