ГРАДОНАЧАЛНИКОТ НА ОПШТИНА СТРУМИЦА КОСТАДИН КОСТАДИНОВ ВО РАБОТНА ПОСЕТА НА ЕВРОПСКИОТ ПАРЛАМЕНТ ВО БРИСЕЛ

Делегација од општина Струмица, на покана на Европратеникот Илхан Ќучук, во рамки на посетата на Европскиот парламент ќе реализира серија средби со претставници на Република Бугарија и Република Северна Македонија

Брисел / Струмица, 04.05.2023 година – Како дел од меѓународната соработка на општина Струмица, на покана на Европратеникот и известувач за напредокот на Република Северна Македонија во Европската Унија, г-дин Илхан Ќучук, од денес, делегација од општина Струмица предводена од Градоначалникот Костадин Костадинов е во работна посета на Европскиот Парламент во Брисел.

Во рамки на посетата, Градоначалникот Костадинов со делегацијата составена од г-дин Александар Оџаков, Секретар на општина Струмица, г-дин Марјан Даскаловски, Претседател на Советот на општина Струмица и г-дин Александар Ненчев, Советник во општина Струмица, ќе реализираат серија средби со претставници на Република Бугарија и на Мисијата на Република Северна Македонија при Европскиот Парламент.

„Градењето на силни и трајни односи меѓу народите значи можност за напредок, размена на искуства, поддршка и промоција на локалниот економски развој и градење на заедници во кои почитта, мирот и стабилноста имаат приоритет. Токму ова е приоритет и за нас, како општина со карактеристична гео-положба. Во оваа насока, во духот на пријателството и добрососедството, а сѐ во интерес на жителите на општина Струмица, продолжуваме да работиме на продлабочување на односите со соседна Бугарија.“ – изјави Костадин Костадинов, Градоначалник на Општина Струмица.

Преку реализацијата на посети и средби од ваков тип, општина Струмица продолжува да работи во насока на развој на односите со меѓународната заедница и идентификација на потенцијалите за соработка за прашања од заеднички интерес од различни сфери.