ГРАДОНАЧАЛНИКОТ НА ОПШТИНА СТРУМИЦА КОСТАДИН КОСТАДИНОВ ВО РАМКИТЕ НА ПРВАТА РЕГИОНАЛНА КОНФЕРЕНЦИЈА ПОСВЕТЕНА НА ПАМЕТНИТЕ ГРАДОВИ ОД ЗАПАДЕН БАЛКАН ГИ ПРЕЗЕНТИРАШЕ ПРОЕКТОТ „СТРУМИЦА – ПАМЕТЕН ВЕЛО ГРАД“ И АКТИВНОСТИТЕ КОИ СЕ РЕАЛИЗИРААТ ВО СТРУМИЦА ВО ОБЛАСТА НА ЕНЕРГЕТСКАТА ЕФИКАСНОСТ

0
525

Регионалната конференција на тема “Безбедни. Зелени. Решенија за паметни градови: Ризик и можности за Западен Балкан“ (Secure. Green. Smart City Solutions: Risk & Opportunities for Western Balkans), на иницијатива на Американската Администрација поддржана од “AmCham” Албанија и Американската Амбасада, а во чии рамки учествуваше и градоначалникот на општина Струмица, Костадин Костадинов, заврши денес.

Во Тирана, Албанија, како дел од конференцијата, на едно место беа обединети претставници на водечки технолошки компании и Градоначалници од Западен Балкан, кои дискутираа на теми од областа на енергетиката, екологијата, урбаниот развој, дигитализацијата, можностите за финансирање на капитални проекти и воспоставување на соработка помеѓу „паметните“ градови.

Во вториот ден од конференцијата, како дел од дискусијата на тема „Добри практики: Време за Урбан Развој преку Зелени Инвестиции“, присутните имаа можност да ја проследат презентацијата на Градоначалникот на Општина Струмица, во чии рамки беа опфатени проектот „Струмица – Паметен Вело Град“ и проектите и активностите кои оваа општина ги спроведува од областа на енергетската ефикасност. Дискусијата ја отвори г-дин Кеј Килмaн (Kay Kilmann), Претставник на Советот за Зелено Градење на Обединетите Американски Држави (The U.S. Green Building Council), а на истата, покрај Градоначалникот на Струмица, учествуваа и г-дин Бедри Хамза (Bedri Hamza), Градоначалник на Јужна Митровица; г-дин Сотираќ Фило (Sotiraq Filo), Градоначалник на Корча; г-дин Јоанис Киркинезис (Ioannis Kirkinezis), Директор за Деловен Развој во “Хил Интернационал“ (Hill International) и г-дин Танасис Каранасис (Thanasis Karanasis), Регионален менаџер за продажба во “АДТРАН“ (ADTRAN Gmbh).

Со реализацијата на конференцијата и размена на искуствата на авторитетите од државите и претставниците на приватниот сектор, се дискутираше за можностите и потенцијалите за развој на градовите од регионот како “паметни градови“, преку имплементација на иновативни решенија од различни области, а сѐ со цел зголемена имплементација на безбедни, зелени паметни решенија и унапредување на квалитетот на живеење.