Георгиевски : Извршивме увид во изградбата на вакуум канализацијата во Јурумлери, заврши првата фаза од проектот

Градоначалникот на општина Гази Баба, Борис Георгиевски денеска заедно со претседателот на Владата на Република Северна Македонија, Оливер Спасовски направија увид во градежните активности каде констатираа дека е завршено поставувањето на вакуум станицата во Јурумлери, која е прва фаза од овој проект и која е прва ваква станица во државава.

Георгиевски пред присутните посочи дека досега е изведена вакуум фекална канализациона мрежа во должина од 3 километри во ова населено место, а поставени се 70 шахти.

• Со изградбата на вакуум станицата решаваме еден од најголемите проблеми со кој жителите се соочуваа со години а целта е да добијат достојни услови за живот и повеќе да не се мачат со септички јами. Работиме совесно и ефикасно и секоја улица каде работевме, веќе е тампонирана, а откако ќе бидат поставени приклучоци до сите домаќинства, улиците веднаш ќе бидат асфалтирани. Следна фаза каде ќе се работи е Дунак маалото и изградба на пречистителната станица покрај Вардар, посочи Георгиевски.

Овој проект е најголем капитален проект во општина Гази Баба кој вкупно чини 152 милиони денари.