Компјутерскиот систем не прави разлика меѓу легално и нелегално прислушувани разговори, туку тој си создава датабаза и ги бележи сите телефонски броеви кои се ставени на слушање, изјави во емисијата „360 степени“ на Алсат-М, министерот за внатрешни работи Оливер Спасовски. Емисијата беше снимена пред драмата која вечерва се случуваше во УБК и полициската станица „Беко“.
Тој вели дека единствениот начин да се попречи спроведувањето на судските наредби што ги има добиено СЈО е некој од УБК физички да ја уништи опремата, за што Спасовски изрази увереност дека е неможно да се случи.
Во однос на изборниот процес кој ја очекува земјата, Спасовски нагласи дека и вака поделено министерство, во кое тој е раководител а неговиот заменик и директорите на БЈБ и УБК се од ВМРО-ДПМНЕ ќе може далеку подобро да се справува со проблемите од тој карактер отколку министерството кое беше нарекувано ВМРО-МВРО.