Градоначалникот на Куманово, Максим Димитриевски, денеска, во Утрински брифинг соопшти дека од централната власт ќе побара целосен карантин на неговиот град, бидејќи како што вели, иако граѓаните главно ги почитуваат мерките, тој не сака неговиот град да стане ново жариште како Дебар.
„Повеќе од потребно е да се делува со поригорозни мерки кои можат да го спречат ова или да го намалат корона вирусот, по примерот на светските метрополи. Иако мерките главно се почитуваат, мерките се злоупотребуваа од страна на поединици, но верувам дека денеска Владата на седница ќе излезе во пресрет и ќе воведе порертриктивни мерки со цел да останеме дома во самоизолација да ја намалиме можноста за заеднички контакти.
Мислам дека граѓаните ја сфаќаат ситуацијата, но има такви со лични ставови на кои им сметаат, а еднаш реков, било какво остварување на личен доход е помалку значајно од здравјето на граѓаните“, вели Димитриевски.
Според него, потребна е поголема комуникација на државните установи со локалните кризни штабови.
„Ние не ги добиваме сите потребни информации, особено во делот на здравството. Особено колку луѓе се тестирани и колку луѓе се заболени. Ние имаме акциски план за справување со кризата, но за жал не е на сила бидејќи имаме вонредна состојба. Комуницирав директно со техничкиот премиер Спасовски и побарав од него да ми се дадат апсолутни ингеренции бидејќи сакам да направам поголема координација. Комуницирав и со министерот Филипче, го побарав и од него тоа. Јас нема да дозволам да се случи во Куманово она што се случува во Дебар“, соопшти Димитриевски.
Тој верува дека ланецот на команда не функционира соодветно, односно дека локалните кризни штабови треба да имаат поголеми ингеренции.
„Сакаме да не дозволуваме непотребно влегување и излегување од градот, со цел да се карантинизира цел град. Во Куманово според неофицијални информации, имаме некаде околу 300 луѓе на листата на МВР за домашна изолација. Апелирам до нив да се придружуваат до мерките“, рече Димитриевски меѓу другото во Утрински брифинг.
.gif)
.gif)
