Во петокот имавме средба со премиерот Никола Груевски на која го искажавме нашето разочарување од тоа што не се испочитувани роковите од договорот од Пржино. Вака британскиот амбасадор Чарлс Гарет ја почна својата изјава предмалку пред Владата, зборувајќи во свое име, како и во име на амбасадорите на Германија, Европската унија, Франција и Италија.
– ВМРО-ДПМНЕ да демонстрира ангажираност за имплементација на договорот, како и конструктивност и да покаже добра волја. Го повикуваме Груевски да го охрабри неговиот тим да најде решение за отворените прашања – рече Гарет.
Тој истакна дека веруваат оти имплементацијата на Договорот од Пржино е најдобар план за излез од политичката криза.
Амбасадорите побараа реформите да се имплементираат бргу, за на крај да се одржат избори коишто ќе бидат признаени и дома и надвор. Тие очекуваат специјалната обвинителка да ги добие условите за работа што ги бара, а опозицијата, односно СДСМ, ја охрабруваат да ги исполни своите обврски од договорот, вклучително и обврската да не продолжат со објавување на прислушкуваните разговори.
– Владата треба да покаже посебна одговорност и треба да дејствува итно и веруваме дека меѓународната заедница е повикана да го поддржи тој напор – рече Гарет.
Меѓународните претставници уште еднаш ги повикаа партиите Договорот од Пржино да го стават пред своите интереси.
Изјавата во целост може да ја погледнете ОВДЕ