И утре (06.02.2017) територијата на Македонија ќе биде под влијание на силно јужно воздушно струење и на МНОГУ ТОПЛА воздушна маса која продира од Северна Африка и која со себе носи транспорт на прашина и песок од Сахара но и МНОГУ ВИСОКИ температури на воздухот (невообичеани за овој период од годината).
Времето во претпладневните часови ќе биде променливо облачно со сончеви периоди, невообичаено топло, спарно и ветровито. Ќе дува умерен до засилен, на некои места повремено СИЛЕН ветер од јужен правец кој ќе достигнува брзина од над 60 км/час.
Во попладневните часови почнувајќи од западните предели територијата на Македонија ќе подпаѓа под влијание на циклонска активност која брзо ќе се движи над нашата територија и која ќе донесе врнежи од дожд кој во текот на вечерните часови и во текот на ноќта кон вторник ќе се прошират и во останатите предели и истите полека ќе се поместуваат кон исток. Исто така во текот на ноќта понеделник кон вотрник на планините врнежите од дожд ќе преминат во врнежи од снег.
На повеќе места врнежите ќе бидат поинтензивни и се очекува да наврнат над 10 л/м2 додека локално и над 20 л/м2 воден талог. Можна е и локална појава на грмежи.
Максималните температури на воздухот ќе се искачат во интервалот од 9 до 16 степени додека во централните и во југоисточните предели повторно е можно истите да бидат нешто повисоки.
Деталната временска прогноза ја подготви СЛАВЧО ПОПОСКИ