АМЕРИКАНСКИОТ ДИПЛОМАТ ПЕРДЈУ СО МОЌНА ПОРАКА : ВРЕМЕТО НА МАЛТРЕТИРАЊЕ ОД СТРАНА НА НАЦИОНАЛИСТИТЕ ВО ГРЦИЈА И БУГАРИЈА ЗА РЕПУБЛИКА СЕВЕРНА МАКЕДОНИЈА ЗАВРШИ

Поранешниот американски амбасадор на САД во Бугарија и еден од коавторите на Охридскиот договор Џејмс Пардју во интервју за „Дојче веле“ (ДВ) вели дека Бугарија мора да биде бранител на членството на Северна Македонија во ЕУ, а не противник, истакнувајќи воедно дека „завршило времето за малтретирање на С. Македонија“.

„Ги следам настаните на Балканот. И се чувствувам близок и со Бугарија и со Северна Македонија. Мислам дека е грешка бугарската Влада да го блокира процесот што ќе доведе до пристапување на Северна Македонија во Европската Унија. Напротив, Бугарија мора да биде бранител на членството на Северна Македонија во ЕУ, а не противник. Бидејќи влезот на Северна Македонија во ЕУ е дел од долгорочниот национален интерес на Бугарија. Сигурен сум дека Стејт Департментот поддржува брзо решавање на проблемите меѓу Бугарија и Северна Македонија, иако темата главно се однесува на Европската Унија и нејзините членки“, вели Пардју.

На прашањето како би можел да изгледа излезот од ситуацијата и дали е можно двете земји наскоро да постигнат договор, тој истакнува дека долгорочен национален интерес на Бугарија е да има добри и партнерски односи со соседите во услови на заеднички демократски вредности. Членството во ЕУ, посочува, го охрабрува ова.

Бугарија и многу луѓе во Северна Македонија имаат заедничка историја и култура, нагласува тој, но Бугарија е понапредната нација и има предност со членството во ЕУ во остварувањето на своите цели. Двете земји, порачува Падрју, се природни сојузници и можат да работат заедно за просперитетна иднина, доколку им го свртат грбот на некои од помалку важните прашања.

„Националистите во Бугарија гледаа како Грција го користи своето членство во ЕУ за да изврши притисок врз Северна Македонија. И тие одлучија да ја спроведат истата стратегија. Но, времето за малтретирање на Северна Македонија заврши“, потенцира Пердју.

Тој оценува дека прашањата за историјата и јазикот, дополнува, не се доволно значајни за да ги оправдаат непријателските односи меѓу двете земји.

„На крајот на краиштата, Северна Македонија е суверена земја. И ниту една држава не треба да има право да принудува друга нација да ја менува својата историја. Историчарите и експертите нека ги расчистуваат контроверзните точки со текот на времето. Во меѓувреме, Софија треба да ја поддржи, а не да ја блокира кандидатурата на Северна Македонија за ЕУ. Сè друго е кусогледо, вели Пердју.