Списокот со имиња на познати политичари, естрадни уметници и луѓе блиски до владејачките партии кои користеле полициско обезбедување, иако според законската регулатива вакво право не им следува, е подолг. „Утрински весник“ неофицијално дознавадека „привилегија“ да имаат полициско обезбедување имале повеќе лица, меѓу кои поранешни и актуелни политичари, пејачи, партиски функционери… Списокот е долг, а лицата со посебна заштита се менувале во зависност од потребите и од ситуацијата.
Информацијата дека во Министерството за внатрешни работи постоела злоупотреба на ресурси ја обелодени новиот министер од СДСМ Оливер Спасовски, кој на седница за пратенички прашања, во дискусија за поделбата меѓу партијата и државата го посочи примерот на генералниот секретар на ВМРО-ДПМНЕ, Емил Димитриев, за кого информираше дека спротивно на законот имал лично обезбедување и возило од МВР.
Тврдењето на Спасовски ниту го коментираа ниту го демантираа од ВМРО-ДПМНЕ. Според неофицијални информации, лично обезбедување и возило од МВР подолго време користеле и некои поранешни министри. Неизвесно е дали и нивните имиња се’ уште се наоѓаат на списокот што ќе го објави Спасовски. Неофицијално се дознава дека во Министерството за внатрешни работи се „чешлаат“ сите податоци и документи кои може да укажуваат на злоупотреба на ресурсите на МВР.