Фото: EPA-EFE/TOLGA AKMEN
Израелските одбранбени сили (ИДФ) соопштија дека нападот врз болницата „Ал Ахли“ бил насочен кон командниот центар на Хамас.
Шефот на британската дипломатија Дејвид Лами денеска ги осуди израелските напади врз медицинските установи во окупираната палестинска енклава Појасот Газа и ги нарече „гнасни“.
Британските медиуми денеска јавија дека во израелски напад врз палестински цели во Појасот Газа две израелски ракети погодиле зграда во болничкиот комплекс „Ал Ахли“.
„Израелските напади врз медицинските установи целосно го деградираа пристапот до здравствената заштита во Газа. Болницата ‘Ал Ахли’ беше нападната повеќепати од почетокот на конфликтот. Овие грозоморни напади мора да престанат. Дипломатијата, а не продолжувањето на крвопролевањето, е начинот на кој ќе постигнеме траен мир“, рече Лами во кратка објава на социјалните мрежи.
Израелските одбранбени сили (ИДФ) соопштија дека нападот врз болницата ‘Ал Ахли’ бил насочен кон командниот центар на Хамас.
Во соопштението на ИДФ се додава дека болничкиот комплекс го користеле терористите за планирање и извршување терористички напади против силите на ИДФ и граѓаните на државата Израел.
Лекарите од болницата ‘Ал Ахли’ претходно денеска соопштија дека нема повредени во израелскиот ракетен напад, но дека се уништени одделите за итни случаи и за прием на пациенти.
