ФИЛКОВ: СДСМ Е ПАРТИЈА ПОЛНА СО КЛИЕНТЕЛИЗАМ, ТИЕ СЕ ПОСЛЕДНИ ШТО ТРЕБА ДА ЗБОРУВААТ ЗА РЕФОРМИ ВО ПРАВОСУДСТВОТО, МИНИСТЕРСТВОТО ЗА ПРАВДА НЕ НОСИ НАБРЗИНА ЗАКОНИ ВО ИНТЕРЕС НА ПОЕДИНЦИ ПО НАЛОГ НА ПАРТИСКИ ШТАБОВИ

Од страна на СДСМ денес повторно слушнавме празна политичка реторика, препакувана во обвинувања кои немаат никаква врска со реалноста.

Иронично е токму партијата која со децении го партизираше правосудството – и преку инсталирани кадри, и преку клиентелизам, и преку селективна правда – денес да се претставува како борец за реформи.

Наводите за „доцнење“ се целосно неточни. Напротив – реформската агенда се реализира согласно планираната динамика, а дел од законите веќе се на ЕНЕР, во фаза на јавна консултација. Министерството за правда не носи закони набрзина во интерес на поединци, одредени фамилии или интересни групи ниту по налог на партиски штабови.

Предлог законите се подготвуваа преку сериозна анализа, консултација со експерти и усогласување со меѓународните стандарди.

Министерството за правда, во координација со Владата, интензивно работи на имплементација на реформската агенда и стратегијата за правосудството (2024–2027). Сите реформски закони кои се подготвуваат се темелни, инклузивни и усогласени со препораките од ЕУ.

Закони не се носат за ПР ефект, туку за системска промена, нешто што СДСМ очигледно не го научи иако имаше шанса.

Во врска со законите за Јавното обвинителство, Судскиот совет, судската служба, платите на јавните обвинители, тие веќе се ставени на ЕНЕР, и истите се во финална процедура.

Во однос на Изборниот законик Министерството за правда ги започна подготовките, но без поддршка од политичките чинители и без консензус, неговото донесување не може да се реализира. Ќе следат разговори на политичките субјекти.

За првпат имаме сериозен пристап во кој се вклучени сите чинители – експерти, меѓународни партнери и граѓанскиот сектор.

Што се однесува до наводната „конструктивност“ на СДСМ – таа завршува онаму каде што почнува лицемерието. Ако навистина имаат конструктивни предлози, ќе ги достават во време и со добра намера, а не ќе ги користат како алатка за прес-конференциски спинови.

Нам, што немаме резервна држава, ниту златни визи, целта ни е да направиме трајна и праведна реформа затоа што Македонија е се што имаме. Го повикувам СДСМ наместо со демагогија да се позанимаваат со давање на искрени одговори – како се набавуваат златни визи и колку истите чинат!