НЕМА ДА ГО УБИЕМЕ ИРАНСКИОТ ЛИДЕР, БАРЕМ НЕ ЗАСЕГА!
Трамп побара безусловно предавање.
Израелската армија проценила дека има можност за напад, но Трамп не го прифатил планот.
Претседателот на САД, Доналд Трамп објави повеќе пораки на социјалните мрежи за Иран, а во една бара „БЕЗУСЛОВНО ПРЕДАВАЊЕ“.
Тој на сопствената мрежа „Трут соушл“ (Truth social) објави дека знае каде се крие иранскиот врховен лидер, ајатолахот Али Хамнеи, но оти засега не е планиран напад врз него.
„Точно знаеме каде се крие така наречениот „Врховен лидер“. Тој е лесна мета, но таму е безбеден – Нема да го извлечеме од таму (убиеме!), барем не засега. Но, ние не сакаме проектили да убиваат цивили или американски војници. Нашето трпение при крај. Ви благодариме за вашето внимание!“, напиша Трамп.
Претходно, американскиот портал Аксиос (Axios) повикувајќи се на неименувани владини претставници објави дека Трамп го стопирал израелскиот план за атентат врз иранскиот врховен лидер ајатолахот Али Хамнеи за време на викендот.Израелската армија проценила дека има можност за напад, но Трамп не го прифатил планот.
Според Аксиос, Белата куќа продолжува да ги поддржува целите на Израел за уништување на иранската нуклеарна и ракетна програма, но е против планот за соборување на Исламската Република со сила.
