Министерот за внатрешни работи Панче Тошковски информира дека полицијата го расчистила убиството што попладнево се случи во гостиварско Дебреше, во кое беше застрелан 35-годишник. Приведени се три лица.
„Веднаш по добиената пријава дека е пукано врз Р. К. (35) од Дебреше воспоставена е оперативна акција ‘обрач’ за пронаоѓање и лишување од слобода на сторителите. По кратко време, сторителите се лишени од слобода и тоа Б. В.(28), Ј. В. (31) и Љ. В. (32)“, информираат од МВР.
Полицијата ја пронашла и автоматската пушка од која е пукано, како и возилото „волво“ со кое осомничените сторители се оддалечиле од местото. По документирање на случајот, како што додаваат од Министерството, ќе биде поднесена соодветна кривична пријава до надлежното Јавно обвинителство.
