Најмалку 20 луѓе се убиени откако вооружени напаѓачи отвориле оган врз група домашни туристи кои посетувале популарно одморалиште во Кашмир под индиско управување, изјавија властите за Би-Би-Си.
Нападот се случил во Пахалгам, живописен хималајски град кој често се опишува како „Швајцарија на Индија“. Главниот министер на регионот, Омар Абдула, рече дека нападот е „многу поголем од се што сме виделе во последните години насочени против цивили“. Според информациите, голем број луѓе се повредени, а некои се во критична состојба.
Премиерот на Индија, Нарендра Моди, рече дека сторителите „ќе бидат изведени пред лицето на правдата“. „Бројот на загинатите се уште се утврдува, па не сакам да навлегувам во тие детали“, изјави Омар Абдула на социјалната мрежа Икс.
Турист од Гуџарат, кој бил дел од групата во која било пукано, изјавил дека по ненадејниот напад настанал хаос и дека сите почнале да трчаат, да плачат и да викаат. Малку позната милитантна група наречена „Кашмирски отпор“ ја презеде одговорноста за нападот во порака на социјалните мрежи.
Тие изразија незадоволство затоа што над 85.000 „натрапници“ се населиле во овој регион, поттикнувајќи „демографски промени“.
