СПАСОВСКИ ЗА ФОКУС : НЕ МОЖЕ ДА ИМА АМНЕСТИЈА ЗА ГРУЕВСКИ, НЕКОИ ДЕЛА МУ ЗАСТАРУВААТ ВО 2036, А „КРВАВИОТ ЧЕТВРТОК“ ДУРИ ЗА 40 ГОДИНИ!

0
429
Интервјуто е објавено на 13 септември во неделникот „Фокус“ со број 1458

Нема да има пардон за никој што е вмешан во случајот со „Онкологија“, без разлика дали е политичар или носител на функција, вели министерот за внатрешни работи, Оливер Спасовски, во интервју за неделникот „Фокус“.

Измените на Кривичниот законик што се донесоа експресно ги гледа како можност, а не како проблем, но, сепак, не прејудицира како ќе завршат актуелните постапки што се водат за поранешни функционери. Сепак, дециден е дека ова не е амнестија за Груевски, дека тој ќе се врати и ќе си ја одлежи казната. Со него разговараме и за борбата на МВР со криминалните групи, а воедно одговара дали има амбиции да стане претседател на државата или лидер на СДСМ  Разговара: Фросина ФАКОВА-СЕРАФИНОВИЌ, ФОКУС.МК

ФОКУС: Пред околу десет дена, полицијата влезе на Клиниката за онкологија по информациите на неделникот „Фокус“ дека вработени на оваа клиника ја продавале скапата биолошка терапија на црниот пазар, а на пациентите, наместо неопходната терапија, им се давала половична терапија растворена со физиолошки раствор. Дали се обезбедени доволно докази за да се докаже овој криминал?

СПАСОВСКИ : Прво сакам да кажам дека во однос на самата помисла за сето она што се случувало на Клиниката за онкологија навистина нема збор со кој може сето тоа да се опише. Ние, знаете дека направивме прибирање на електронските уреди и се преземаат низа криминалистички мерки и активности, сѐ со цел да се приберат што е можно повеќе докази во овој дел. Морам да напоменам дека се работи многу интензивно на целиот овој случај за да се види што точно се правело и кои се виновниците и учесниците. Важно е поради тоа што секој криминал, па и овој, мора да има име и презиме и оние кои директно учествувале, ќе мора да носат сериозна одговорност. Така што, интензитетот е голем во делот на истрагата, се преземаат низа мерки, како што напоменав, се прават разговори со одредени лица што учествувале во ова, кои можат да дадат дополнителни информации и на основа на тоа секако дека ќе ги преземеме следните чекори во овој случај, по насоки на јавниот обвинител.

ФОКУС: Кога би можело да се очекува разрешница?

СПАСОВСКИ: Ние работиме и посакуваме тоа да се случи час поскоро поради тоа што е важно и заради јавноста и заради сите нас, да се заврши предметот што е можно побргу, меѓутоа многу поважно од брзината е квалитетот. Не е добро да направиме случај во кој од побуди на задоволување на јавноста, во одреден момент ќе се намали квалитетот на прибраните документи или нема да бидат собрани доволно докази. Напротив, сметам дека квалитетно собраните докази, дефинирањето точно на тие што се виновниците е многу поважно во овој момент, иако и динамиката за нас е сериозно важна.

ЌЕ ОДГОВАРА СЕКОЈ ЗА „ОНКОЛОГИЈА“

ФОКУС: Дали оваа афера ќе ви помогне пред избори да ја вратите довербата кај гласачите на вашата партија?

СПАСОВСКИ: Довербата кај гласачите е работа на партијата, на партиските органи и низ низа активности сигурно дека преземаат многу мерки што значат остварување на тоа што партиите го ветуваат и реализацијата. Меѓутоа, овде станува збор за работа на институциите, не за работа на партија и овде станува збор за борба со криминалот, кој не познава партии, кој не познава вера, не познава нација и за мене тоа е најважно.

ФОКУС: Дали во овој случај ќе завршат во затвор само ситните риби, со оглед на тоа што вакви малверзации не би можеле да се прават без да знае раководството, кое и да било.

СПАСОВСКИ: Јас не милувам да разговарам за некакви ситни или крупни риби, кога станува збор за криминалец. Криминалец е криминалец. Зар мислите дека помал или поголем криминалец е тој што седи на некоја позиција од некој обичен граѓанин. Секој што се занимава со криминал е криминалец и секој треба да носи одговорност. И затоа кажав и мој јасен став е дека мора да одговара секој што е инволвиран во тој случај, без разлика каде е на хиерархијата на државната поставеност, на колку висока позиција, ако учествувал во ова и ако давал одредени насоки, одобрувања итн. Ќе носи одговорност, што сака нека е! Меѓутоа важно е да ги утврдиме сите докази и на основа на доказите да се носи таква одговорност. Нема да има пардон дали е политичар, дали е носител на функција, дали е од една или од друга политичка партија, воопшто не ме интересираат ниту партиите, ниту што било друго, туку да се утврди она што е интерес на граѓаните.

ФОКУС: Владата предложи, а Собранието експресно ги изгласа измените на Кривичниот законик, кои предвидуваат пониски казни за функционерите што ќе ја злоупотребат својата позиција. Кој е вашиот став за измените со кои застаруваат 14 судски предмети со над 80 обвинети?

СПАСОВСКИ: Прво, сметам дека мора да се направат низа мерки и активности, тука вклучувајќи и промена на законската легислатива што ќе придонесат за некаква поефикасна борба во однос на корупцијата и криминалот во општеството. Кога зборувам ефикасност, тоа значи да имаме ефикасни, брзи постапки во кои тие што ги злоупотребиле своите позиции, влегувале во висока корупција, да можат на многу брз и ефикасен начин да бидат процесуирани и сето она што го имаат стекнато да биде конфискувано и да биде вратено назад. Така што измената на Кривичниот законик јас ја гледам не како проблем, туку како една можност. Сакам да напоменам дека воопшто не станува збор за Закон со кој ќе има амнестија, таму не може да има амнестија за никого. Таа е во директна согласност со директивата на Европската Унија, во која се предвидува проширена конфискација.

ИЗМЕНИТЕ НА КЗ НЕ СЕ АМНЕСТИЈА

ФОКУС: Кои се Вашите аргументи за ова?

СПАСОВСКИ: Сведоци сме дека судските постапки траат многу долго, со години и не се случува да биде конфискуван имот. Ако погледнете историски, ќе видите дека од 90-та година, па некаде до 2017 година ние сме имале само три конфискации на нелегално стекнат имот. Тоа што ни траат судските постапки многу долго, тоа што сите функционери биле подведувани под еден член „злоупотреба на службената положба и овластување“, без притоа да се конкретизираат кривичните дела што се направени, претставува проблем и во правниот систем. И тоа никаде го нема во земјите-членки на Европската Унија. Таму има плејада, низа кривични дела под кои можат да бидат подведени сторените кривични дела од функционери и на тој начин да носат одговорност и притоа да не се соочиме со ситуација во која ќе имаме 30, 40, 50 или повеќе носители на функции што ќе бидат подведени под истиот член и притоа ќе се докажуваат за тоа дали е злоупотребена функцијата или не е злоупотребена, колку сме презеле мерки, имало доволно или недоволно докази, а притоа имате, на пример, друго кривично дело што е сторено и за кое се исполнети елементите, остварено битието на тоа кривично дело. Но, тој функционер или граѓанин не се подведува под тоа кривично дело и имаме сериозен проблем.

ФОКУС: Точно е дека ЕУ бара поефикасна конфискација и точно е тоа дека многу често се гони за злоупотреба на службената положба, но што е со судските процеси што се сѐ уште активни, а кои со овие измени на Кривичниот законик паѓаат во вода?

СПАСОВСКИ: Измените на Кривичниот законик прво не го укинуваат кривичното дело „злоупотреба на службената положба“. Укинуваат некој став за кој се гони и за тоа обвинителот има можности да направи преквалификација на делото на основа на доказите што ги има. Значи не станува збор дека не може да се одговара, дека некој овозможува преку измена на овој закон да не се носи одговорност. Станува збор за тоа дека мора истражните органи, предистражните органи да бидат инвентивни и да ги користат кривичните дела, кои се огромен број во Кривичниот законик и на основа на тоа да се носи одговорност. Како што реков, тоа е сериозен проблем. Имате постапки што се отворени 2015, 2016, 2017 година и до денеска нема конечна пресуда. Тоа е клучниот проблем во македонското општество, граѓаните сакаат да видат предвидливост и следливост на постапките, од моментот на отворањето на постапката да ја видат крајната состојба, да се издржи казната затвор и да се конфискува имотот што е нелегално стекнат, доколку го има.

НЕ ПРЕЈУДИЦИРАМ ЗА ПОСТАПКИТЕ

ФОКУС: Сакате да кажете дека за овие кривични дела, обвинителот може да направи преквалификација на делата и да продолжат постапките против поранешни функционери?

СПАСОВСКИ: За постоечките постапки – едно е застареноста и едно е одолжувањето на постапките што ги имаме, а второ, со измените на законот, не е направена можност со која некој ќе биде ослободен од обвинение.

ФОКУС: Да, но факт е дека со измените запираат постапките за дел од функционерите.

СПАСОВСКИ: Едно е исполнувањето на битието на кривичното дело, а второ е можноста од застареност. Мислам дека премногу го следиме процесот на застареност на предметите и во исто време го поврзуваме со ова. Јас немам точна анализа, сега зборувам како МВР и тоа не е наша надлежност да анализираме што точно ќе се случува со одредени предмети, меѓутоа важно е дека ова не е закон за амнестија, тоа е една работа, односно и понатаму ќе се водат постапки и за тоа кривично дело злоупотреба на службената положба, а најзначајно е дека постапките ќе бидат и брзи и ефикасни. Во однос на постапките, тие се водат и на основа на аргументацијата што ја имаат обвинителите и судот ќе можат да ги носат одлуките. Јас не можам да прејудицирам што може да се случува со постапките. Само укажувам дека законските основи не се отстранети со измените на Кривичниот законик.

ФОКУС: ВМРО-ДПМНЕ критикуваше, но, сепак, обезбеди кворум за носење на уставните измените. Како го толкувате тоа?

СПАСОВСКИ: Ако тргнувавме од такви претпоставки, тогаш сигурно денес ќе зборувавме за Закон за амнестија на кого било, а не за закон за измена на Кривичниот законик. Сосема е различно.  Второ, ако имало какви било договарања на политичко ниво во однос на решение на кој било проблем, носење какви било политички одлуки, сигурно одлуките би ги носеле единствено.

ФОКУС: Дали има договор меѓу власта и опозицијата со измените на Кривичниот законик да се спаси поранешниот претседател на ВМРО-ДПМНЕ, Никола Груевски и други функционери од опозициската партија, а за возврат да се обезбедат гласови за донесување на уставните измени, како што обвинува албанската опозиција?

СПАСОВСКИ: Груевски има низа предмети што се водат, за кои застареност може да се очекува во 2036 година, има предмети за кои не е водена постапка поради тоа што не бил достапен. Еве за организацијата на настаните од 27 април, застареноста чинам е дури по 40 години. Тоа покажува дека нема никаква основа за ослободување од кривична одговорност за никого, ниту за него. На кој начин ќе се анулираат тие постапки што се водат овде во институциите? Тоа е можно само со амнестија, таква работа немаме денес. Така што сите овие и актуелни и поранешни функционери не се апсолутно изземени со измените во овој закон и не значат да не се носи одговорност за тоа што го правеле.

ГРУЕВСКИ ЌЕ СИ ОДЛЕЖИ

ФОКУС: Сега како гледате на вашата изјава дека сте сигурен дека ќе се врати и ќе си ја одлежи казната? Останувате ли на тоа?

СПАСОВСКИ: Исто како и во тој момент. Сигурен сум затоа што ви напоменав има кривични дела што му застаруваат во 2036 година, има кривично дело за кое се гони за организирање на нападот на Собранието и можноста за убиството на пратениците и на сите што беа во Собранието, кое застарува дури за 40 години.

ФОКУС: Меѓутоа, многумина веќе почнаа да го чекаат моментот кога Груевски ќе се врати на бел коњ.

СПАСОВСКИ: Ви кажав дека за него се водат многу постапки за кои ќе има сериозна кривична одговорност, така што ниту има каква било основа за некаков страв, ниту за каков било восхит – посебно не за Груевски.

ФОКУС: Сите се за ЕУ декларативно, имаше расправа во Собранието за уставните измени, но двотретинско мнозинство нема. Ќе чекаме да се договарате зад затворени врати со политичките партии?

СПАСОВСКИ: Декларативниот став дека сите сме за ЕУ треба да биде артикулиран низ политичките одлуки што се носат во Собранието. И треба да се искористат сите дозволени ефикасни демократски механизми за да се дојде до двотретинско мнозинство. Јас сметам дека одговорноста на политичарите треба да биде на едно многу повисоко ниво од претходно, затоа што застојот на државата во евроинтеграциските процеси ќе биде сериозен проблем за граѓаните и тоа треба да биде основата какви одлуки ќе носите или за што тоа го правите во одреден момент. Апсолутно легитимно е да се разговара со политичките субјекти.

ФОКУС: Кое е решението, ако Мицкоски е дециден дека пратениците на ВМРО нема да гласаат?

СПАСОВСКИ: Решението е низ политички дијалог, низ изнесување аргументи што се сериозни, и во прилог на уставните измени, и во прилог на евроинтеграцискиот процес. Одлуката за уставните измени не е само одлука за внесување на малцинствата во Уставот, таа одлука за отворање на перспективите на државата кон ЕУ.

РАЗГОВОРИ СО ПРАТЕНИЦИ

ФОКУС: Се водат разговори со пратениците?

СПАСОВСКИ: Се водат, секако дека разговараат и претседателот на Владата и одредени министри и со опозицијата, и со пратеници во Собранието итн. И со пратеници од власта, не само од опозицијата. Тоа е широко отворена дебата во македонското општество и така треба да биде.

ФОКУС: Дали има непристојни понуди до пратениците?

СПАСОВСКИ: Не, непристојните понуди се криминал. И тие непристојни понуди треба да бидат процесуирани. Јас зборувам за политички дијалог, не за непристојни понуди. Непристојни понуди од кој било аспект, па и во политиката е криминал. Мислам дека не треба да ги промовираме непристојните понуди, туку треба да промовираме демократско и високосвесно размислување.

ФОКУС: Дали е вклучен меѓународниот фактор во тие преговори за обезбедување мнозинство за носење на уставните измени? И дали е случајно што Кривичниот законик се смени по посетата на Ескобар, кој имаше средби и со власта, и со опозицијата?

СПАСОВСКИ: Меѓународниот фактор силно нѐ поддржува во процесот, не само на носење на уставните измени, туку целосно во процесот на отворање на преговори со Европската Унија. Низа процеси што поминаа, како потпишувањето на Договорот со Грција, со Бугарија итн., сето тоа бараше да имаме поддршка. Инаку ако немате поддршка од партнерите таму каде што сакате да бидете дел од тоа семејство, многу тешко се движат работите.

ФОКУС: За најголемите трагедии во земјава, автобуската несреќа кај Ласкарци, потоа изгорениот македонски автобус во Бугарија, како и за пожарот во тетовската модуларна болница, ниту еден нема виновен. ЕУ цело време апелира за поефикасна борба против корупцијата, власта зборува дека е за европскиот пат. Дали со нерасчистувањето на овие вакви случаи се покажува искрена борба против корупцијата?

СПАСОВСКИ: Јас сум можеби еден од ретките во политиката, кој јавно говорел во однос на постапките што се водат во судовите и кој го осудувал таквиот начин на водење на постапките и затоа сметам дека едно е да ги завршите сите предистражни постапки, како и истражната постапка, да обезбедите докази, да учествуваат претставници од институцијата со која раководам, ефикасно и набрзина да се достават сите барани податоци до надлежните органи и притоа гледате дека низ судските процеси се наоѓаат низа методи што се користат за одолжување на постапките. Тоа е нешто што директно удира врз кредибилитетот на судскиот систем и не случајно довербата на граѓаните во судските институции е толку ниска.

КРИВИЧНА ОДГОВОРНОСТ ЗА ЗАСТАРУВАЊЕ

ФОКУС: Да, вие ги осудувавте јавно овие постапки, но што со тоа осудување? Кога бевте во опозиција, најжестоко се боревте против Груевски и Мијалков, а сега Груевски е во Будимпешта, а Мијалков издржува казна затвор во отворен затвор во Струга и се чека денот кога ќе биде на слобода.

СПАСОВСКИ: Затоа сметам дека мора да се најдат механизми со кои кривична одговорност ќе мора да имаат и тие што носат вакви одлуки или тие што не носат одлуки. Еве, на пример, случувањата во судскиот совет и други. Не може преку непреземање активности од страна на кој било и да е, да ги застарувате предметите што се во судска постапка. Некој ќе рече не треба да се меша политиката во судството. Да, јас не сакам да се мешам во одлуките на судот, меѓутоа сакам да бидат брзи и ефикасни тие одлуки, сакам да видат луѓето дека некој носи одговорност, да не зајакнува таа перцепција дека некој некого може да штити. Напротив, нека биде брзо и ефикасно!

ФОКУС: Во последните неколку месеци се случија неколку мафијашки пресметки, убиени беа неформални лидери на криминална банда. Дали имате некакви информации за прегрупирање на криминалните групи во освојувањето на нарко-пазарот и појава на нови групи?

СПАСОВСКИ: Најважната работа е тоа што МВР сериозно се насочи кон криминалните групи и сузбивањето на криминалот во државата и тука гледате дека без никакви калкулации и најефикасно работиме во сузбивањето на која било од тие криминални групи што дејствувале, не само сега, туку дејствувале и биле градени во изминатите 30 години по независноста на Македонија и најмногу простор им се даде во делот на функционирањето на режимот. Паднаа во вода кажувањата дека едните или другите групи, не знам – од Грчец, од Арачиново, Сарај, Чаир итн. не биле процесуирани. Во последните месец дена, три најголеми криминални имиња се уапсени и одведени пред лицето на правдата.

ФОКУС: Кои имиња?

СПАСОВСКИ: Сите три од „Планина“, кои беа од кланот Грчец, така што сите до еден, без разлика кој сака нека е, на основа на сите докази што ги имаме, жестоко се бориме против криминалните структури и тоа е задача на оперативната акција „Безбеден град“ и на сите активности што ги презедовме во изминатиот период. Нема да има пардон за никого и во ниту еден момент.

ФОКУС: Имате ли информации за Шеваљ Муареми од Грчец, тој нели беше надвор од Македонија?

СПАСОВСКИ: Секако дека имаме информации, за секоја криминална структура имаме многу информации, се прибираат доказите, а врз основа на доказите се бара одговорност.

ФОКУС: Каде е сега?

СПАСОВСКИ: Тоа е податок, кој во оваа фаза не може да се изнесува.

НЕМА ПОСИЛЕН ОД ДРЖАВАТА

ФОКУС: Дали е точно дека нарко-групата „Барон“ периодов зема замав и дека уапсените за двојното убиство во „Шиша бар“ се припадници на оваа група?

СПАСОВСКИ: Ако се уапсени – не постои група, таа е разбиена криминална група, како сака нека се нарекува, воопшто не е важно нивното име. Важно ми е дека секој што смета дека е посилен од државата, длабоко мора да се разочара, затоа што нема посилен од државата – ни криминалец, ни функционер, ни граѓанин, никој не може и не смее да биде посилен од државата.

ФОКУС: Кумановскиот градоначалник Максим Димитриевски ве обвинуваше дека често бил повикуван на разговор во полиција за да се вршат опструкции на работењето на општината. Какви пријави има поднесено против Димитриевски?

СПАСОВСКИ: Не само против функционер, градоначалник, министер… пријави има секојдневно и по тие пријави мора да се постапува. Самите граѓани и ние бараме да нема селективност во постапките, мислам дека најмалку што може да придонесе во која било постапка, ако некој политичар е посебно одговорен, е тоа да дојде да го каже тоа што го има во рамките на постапките, дали во полиција или во јавното обвинителство, тоа не е нешто што е надвор од кој било процес. За кој било политичар важат исти правила и никој не може да биде привилегиран.

ФОКУС: Значи тврдите дека не се поради некој личен анимозитет?

СПАСОВСКИ: Јас, прво, немам право да бидам личен во работењето поради тоа што ова е премногу сериозна работа за вие личните работи да ги ставите пред државата. Напоменувам неколкупати дека државата е, пред сѐ, граѓаните се пред сѐ и тука нема место за емоции, нема место за лични работи, нема место за лични недоразбирања.

ФОКУС: Дали го сметате за личен политички неуспех тоа што СДСМ не успеа да го победи Димитриевски како независен кандидат, во вашиот роден град?

СПАСОВСКИ: СДСМ сега е опозиција во градот и сметам дека барем сега се покажа разликата што значи кога СДСМ раководи со градот, а што значи кога ВМРО раководи со градот, затоа што денес де факто имате локална власт што е на ВМРО-ДПМНЕ. Резултатите ќе ги сумираме на крајот.

ПРЕТСЕДАТЕЛ ИЛИ ЛИДЕР?

ФОКУС: Дали се гледате како евентуален иден претседател на државата или претседател на партијата, со оглед на тоа што некои анкети покажуваат дека имате најголема доверба меѓу министрите.

СПАСОВСКИ: За мене е важно од првиот момент кога станав министер, носител на функција на извршната власт, да ги оствариме очекувањата на граѓаните, а тоа значи да ги јакнеме институциите.Така што за мене врвен приоритет е до крајот на мандатот да ги реализираме задачите што сме ги поставиле пред нас. Во однос на политичката дебата, што е тоа што треба да направиме во иднина – тие политички дебати ќе ги разговараме во рамките на партијата.

ФОКУС: Би прифатиле ли да бидете кандидат за претседател?

СПАСОВСКИ: Сѐ уште е рано да разговараме на оваа тема, тоа ќе дојде во моментот кога ќе се разговара во рамките на партијата. Сега сум насочен на активностите во Министерството и во Владата.

ФОКУС: Се гледате ли како иден лидер на СДСМ?

СПАСОВСКИ: Тоа се претпоставени прашања на кои можеме да разговараме, но во услови кога имаме состојба за остварување на најважната национална цел – членството во ЕУ, подготовката за избори, за мене е многу важно добро позиционирање на СДСМ, давање добра понуда на граѓаните и, секако, да ја добие довербата целиот тој кампус за проевропска Македонија, кој има јасна визија и со целата сила, со целиот мој капацитет ќе работам на остварување на овие цели.

ФОКУС: Комуницирате ли со Заев?

СПАСОВСКИ: Јас комуницирам со сите во партијата и нема причина да не комуницирам со кој било претседател на СДСМ. Напротив, тие се мои другари, мои соборци и во секој момент сум тука за сѐ, и за партијата, и за сите нив лично.

ИЗБОРИТЕ НЕ СЕ РЕШЕНИЕ

ФОКУС: Има ли опција за предвремени избори

СПАСОВСКИ: Јас сметам дека изборите во овој момент не се решение поради тоа што 2024 година е изборна година. Зошто би губеле време на изборни процеси, кои ништо нема да донесат. Ништо нема да донесат ниту во овој момент, ниту по изборите. Важно е овој процес да го водиме, да ги отвориме перспективите и потоа имаме изборна година во која ќе кажат граѓаните како треба и каде ја гледаат државата, кој е концептот што треба да биде поддржан за да се оди напред.

ДОНАТОРИТЕ ДА НЕ УЧЕСТВУВААТ НА ТЕНДЕРИ

ФОКУС: Управителот на фирмата „Еуровиа“ што МВР ја избра да ја гради полициската станица во Аеродром е најголемиот донатор на ДУИ. Дали ова според Вас е законски?

СПАСОВСКИ: Оваа постапка за избор на најповолен понудувач е завршена и е избран најповолниот понудувач од вкупно 12 понуди што биле поднесени на оваа јавна набавка и притоа се спроведе јавна аукција, електронска, на која наддавале седум понудувачи. Побарана е банкарска гаранција во висина од 15 проценти од вкупната сума, како едно од обезбедувањата што ги направи Министерството за внатрешни работи. Тоа е законската постапка што е спроведена во однос на оваа набавка и во однос на градбата на полициската станица и тука се испочитувани сите критериуми.

ФОКУС: Но, како може донатор да добива цело време државни пари?

СПАСОВСКИ: Јас се согласувам, за оваа тема треба да се размислува и можеби, еве, да се измени Законот за јавни набавки и нека стои дека донатори на политички партии не треба да учествуваат во јавни тендери, тоа можеби е најчиста позиција за сите нас. Но, сега ние немаме таква забрана и ние немаме основа да елиминираме кој било во овие постапки.  Еве, ова нека биде иницијатива да се смени законот и нека се стави дека  донатори на политички партии не може да учествуваат во тендерите и тоа би било најчиста позиција за сите.

СДСМ МОЖЕ МНОГУ ПОВЕЌЕ ДА РАБОТИ

ФОКУС: Како според вас сега функционира СДСМ, дали може да се направи споредба како функционираше во време на Заев, а како сега на чело со Ковачевски?

СПАСОВСКИ: Јас сега сум член на Централниот одбор, не сум член на раководството, бев претходно и генерален секретар, бев и потпретседател… Знаете во партиското работење секогаш може повеќе. И сега сметам во овој момент дека може многу повеќе да се работи, дека многу повеќе треба да се комуницира со јавноста, со членството, да се артикулираат политиките што ги имаме, што ги спроведуваме и на сето тоа гледам како една можност на подобрување на позициите на СДСМ.

ФОКУС: Дали ги кажувате овие ваши ставови во партијата и каква е вашата соработка со Ковачевски?

СПАСОВСКИ: Сите мои ставови и сите мои размислувања, сето она што сметам дека треба да биде искажано, го искажувам во рамките на органите на партијата, така било секогаш и така ќе остане и понатаму. Имам одлична соработка со претседателот и со него разговараме на сите овие теми и сметам дека низ тој дијалог доаѓаме до заеднички решенија што треба да бидат преземени за да се подобрат состојбите. Нема никогаш штета од реален и објективен разговор за состојбите. Ако објективно погледнете на работите, вие може да сметате дека ќе имате сериозен успех.