Министерот за надворешни работи на Унгарија, Петер Сијарто денеска ја критикуваше одлуката на Вашингтон за воведување санкции на шефот на кабинетот на унгарскиот премиер Виктор Орбан – Антал Роган, поради сомневање дека е вмешан во корупција во Унгарија. Во објава на Фејсбук оцени дека тоа е „лична одмазда“ на американскиот амбасадор во Унгарија во заминување, како и на американската администрација во заминување, бидејќи унгарската влада го поддржа републиканецот Доналд Трамп на ноемвриските избори, пишува унгарски „Индекс“.
– Заминувањето (на актуелниот американски амбасадор) од овде без достоинство е лична одмазда кон Антал Роган. Колку е одлично што за неколку дена на чело на САД ќе имаме луѓе кои ја сметаат нашата земја за пријател, а не за непријател – заклучи Сијарто. Американското Министерство за финансии го обвини Роган дека ја користи својата позиција за да обезбеди финансиски придобивки за себе и за неговите политички сојузници, соопшти Стејт департментот. Роган е близок сојузник на Виктор Орбан и моментално ја надгледува унгарската тајна служба.
