Одложен е почетокот на судскиот случајот „Пуч“, во кој обвинети се лидерот на СДСМ Зоран Заев, поранешниот разузнавач, Зоран Верушевски, неговата сопруга Соња, општинскиот службеник од Струмица, Бранко Палифров и Ѓорги Лазаревски, вработен во МВР.
Судијката Снежана Башевска констатираше дека иако уредно е поканет на рочиштето не беше присутен Заев поради што не се исполнети условите за почеток на процесот. Таа сакаше рочиштето да се одржи до крајот на месецот, со образложение дека двајца од обвинетите се во притвор, но на инсистирање на адвокатите 7 септемрви се одреди како датум прифатлив за сите страни.
Адвокатот на обвинетите Филип Медарски рече дека за овој случај постои политички договор да премине во рацете на специјален јавен обивнител и дека Заев јавно кажал дека нема да доаѓа на судските рочиште, на што судијката врати дека таа работи според факти, а не врз основ на јавно дадени изјави и политички договори.
Со договорот од Пржино предвидено е на 15 септември во собранието да биде избран специјален јавен обвинител кој ќе треба судскиот процес „Пуч“ да го разгледува одново, како и да ги утврдува фактите во врска со кривичните пријави што ги поднесе СДСМ, а кои произлегуваат од објавените прислушувани разговори.
