Посмртните останки на сите 67 жртви од судирот на патнички авион на „American Airlines“ и воен хеликоптер што минатата недела се случи над реката Потомак, се извлечени од водата. Речиси сите се идентификувани. Во меѓувреме, Националниот одбор за безбедност во сообраќајот (НТСБ) соопшти дека ги анализира најновите податоци што покажуваат дека хеликоптерот го надминал максималниот дозволен плафон на летање од 61 метар.
Според податоците од радарските сензори и други извори на главниот екран од контролата на летање на аеродромот, хеликоптерот летал на височина од 91 метар, соопштија од НТСБ. Истражителите изјавија дека за да се потврдат овие бројки потребни се повеќе информации од хеликоптерот, што сè уште е под вода. Авионот летал на висина од 99 метри, со минус седум до осум метри погрешност.
-Семејствата на жртвите кои ја преживуваат оваа трагична загуба се во нашите срца, се наведува во заедничката изјава на градските и федералните агенции кои учествуваат во потрагата. Од реката се веќе извлечени десното крило на авионот, централниот дел на трупот, делови од предната кабина, фрагменти од опашниот капак и вертикалниот стабилизатор. Властите изјавија дека сега се фокусирани на вадење на остатоците на авионот и се надеваат до крајот на неделата да го извлечат и хеликоптерот.
