Хрватскиот премиер Андреј Пленковиќ денеска изјави дека е шокиран од инцидентот во основното училиште во Пречко, во кој непознат напаѓач ги нападна наставничката и учениците од тоа училиште. – Згрозени сме од оваа голема трагедија.
Таму моментално се министерот Божиновиќ и министерот Фукс. Полицијата се обидува да утврди што точно се случило. Имаме информации дека неколку ученици се лекувани во загрепските болници – изјави Пленковиќ на почетокот на седницата на хрватската влада. Во напад со нож утрово во основно училиште во загребската населба Пречко, загина едно дете, а повредени се наставничка и други ученици.
Како што пренесуваат хрватските медиуми, неофицијално се работи за 15-годишник кој не се знае дали бил ученик од истото училиште и кои му биле причините да го изврши нападот.
