На маргините на Анталија Дипломатскиот форум, остварив одвоени билатерални средби со генералниот секретар на ОБСЕ, Феридун Х. Синирлиоглу, со високиот претставник во Босна и Херцеговина, Кристијан Шмит, со заменик-премиерот и министер за надворешни работи на Република Молдавија, Михаил Попшоју, со министерката за надворешни работи на Грузија, Мака Бочоришвили, и со Европратеникот, Илхан Кјучук.
Со високиот претставник Шмит, фокусот беше ставен на политичката состојба во регионот, европската перспектива на Западен Балкан и значењето на постојана ангажираност за стабилност, мир и помирување. Средбата со генералниот секретар на ОБСЕ, Синирлиоглу, беше исклучително конструктивна – насочена кон размена на ставови за безбедносните предизвици и идентификување на потенцијалот за унапредување на регионалната стабилност и соработка.
Со моите колеги од Молдавија и Грузија ја потврдивме одличната билатерална и мултилатерална соработка, со заедничка заложба за натамошно интензивирање на економските и трговските релации, како и за продлабочување на соработката во рамките на европските интегративни процеси.
На средбата со европратеникот Илхан Кјучук разговаравме за евроинтеграцискиот процес на државата. Нагласив дека отворањето и водењето на пристапни преговори е најдобриот механизам за обезбедување на неповратноста на реформските процеси и демократскиот развој.
Во тој контекст, ја истакнав неопходноста од деескалација на билатералните блокади и враќање на процесот во неговата суштинска рамка – оценка според заслуги и исполнети критериуми.
Фејсбук статус на министерот за надворешни работи и надворешна трговија, Тимчо Муцунски.
