ЧЕСТИТИКА ОД ПРЕТСЕДАТЕЛОТ НА ВМРО-ДПМНЕ ХРИСТИЈАН МИЦКОСКИ ПО ПОВОД ПРАЗНИКОТ СВЕТИ КЛИМЕНТ ОХРИДСКИ
На овој голем ден оддаваме должна почест и почит за неговото големо духовно-просветителско дело на Св. Климент Охридски, нашиот голем народен светител и просветител, кој го упати народот во верата и го издигна на образовно, морално и духовно поле.
Ликот и делото на Св. Климент Охридски се силно врежани во македонската историја.
Св. Климент Охридски е основоположникот на Македонска православна црква и на нашата писменост и култура. Тој претставува фигура која го осветли патот на многу луѓе кон Бога, со зборови ги упатил народите во верата Божја, како прв македонски епископ, а како творец на познатата Охридска школа е најзначајниот македонски средновековен писател и педагог. Со силна вера, дисциплина и посветеност, ги надминуваше пречките коишто му стоеја на патот, неуморно ширејќи ја својата пастирска љубов.
Денес кога се соочуваме со бројни предизвици потребно е да го следиме неговото дело кога со сплотеност и единство ги надминуваше и најсилните пречки. Свети Климент стана заслужен не само за македонскиот народ туку и за целиот христијански свет, насочувајќи го кон идното време.
Нека ни е честит и за многу години големиот празник – Свети Климент Охридски!
Фејсбук статус на премиерот и претседател на ВМРО-ДПМНЕ, Христијан Мицкоски.
