Според министерот за внатрешни работи, Панче Тошковски, причината за несреќата најверојатно е огромна неприлагодена брзина на еден од учесниците во сообраќајката кој е меѓу починатите. Тешката сообраќајна несреќа со трагични последици се случила на 18 април околу 20:40 часот на магистралниот пат Кичево – Гостивар, во близина на местото викано „Сеферов бунар“, соопшти СВР Охрид. Во несреќата учествувале три патнички возила – „мерцедес“ управуван од З.Д. (64) од Битола, „форд“ управуван од А.Р. (63) од кичевското село Горно Страгомиште, и „опел“ управуван од Х.Е. (38) од Гостивар.
На самото место на несреќата загинале возачот на „мерцедесот“, З.Д., и возачот на „опелот“, Х.Е., додека сопатничката во „опелот“, Б.Е. (38) од Гостивар, починала откако била пренесена во Медицинскиот центар во Кичево. Смртта на сите тројца ја констатирал лекар, а по наредба на јавен обвинител телата се предадени на обдукција. Со телесни повреди се здобиле уште седум лица: возачот на „фордот“ А.Р. и неговата сопатничка А.А. (67) од село Колари, сопатникот во „мерцедесот“ Д.С. (37) од Кичево, како и четворица сопатници во „опелот“ – тројца малолетници од Гостивар и Р.Е. (60) од село Шутово, кичевско. Повредите им се констатирани во здравствени установи во Кичево и Скопје.
На местото на несреќата увид извршија јавен обвинител, судски сообраќаен вештак и полициски екипи. Според министерот за внатрешни работи, Панче Тошковски, причината за несреќата најверојатно е огромна неприлагодена брзина на еден од учесниците во сообраќајката кој е меѓу починатите. Како што додаде министерот бројот на жртви во сообраќајки во првиот квартал од 2025 година е сличен како лани, но бројките се катастрофални во споредба со европските стандарди. Тој најави имплементација на проектот „Безбеден град“ на територијата на целата држава.
Извор: Новинска агенција МЕТА
