МВР СИНОЌА БЕШЕ СО ПОЛНИ РАЦЕ РАБОТА: Растурени три журки во Скопје по пријава од граѓани, извршени контроли во 288 угостителски објекти

0
480

Во врска со донесената Одлука на Владата на Република Северна Македонија за постоење на кризна состојба на територијата на државата заради заштита на јавното здравје во услови на постоење на пандемија од ковид-19 и согласно изготвениот Оперативен план за постапување на Министерството за внатрешни работи, СВР Скопје преку Единиците за внатрешни работи, во временскиот период од 12.00 часот на 31.12.2020 до 04.00 часот на 01.01.2021 спроведе зајакнати мерки и активности самостојно и во соработка и содејство со Државниот пазарен инспекторат, со цел контрола за спроведување на препораките за работата угостителските објекти, спречување на можни нарушители на јавниот ред и мир и спречување на вршење на кривични дела и прекршоци за време на новогодишната ноќ.

Притоа, во текот на новогодишната ноќ на подрачјето на СВР Скопје извршени се зајакнати контроли во угостителски објекти при што се контролирани 288 угостителски објекти. Од преземените мерки и активности не се констатирани неправилности при спроведување на протоколите во врска со ковид-19.

Во текот на ноќта костатирани се осум прекршоци од Законот за прекршоците против јавниот ред и мир, а на 31.12.2020 во 18.40 часот на ул.„Иван Козаров“, пред угостителски објект, поради нарушување на јавниот ред и мир приведени се М.Н.(18) и И.Д.(18) и по документирање на случајот ќе бидат поднесени соодветни поднесоци. Констатирани се и 29 прекршоци за неносење лична заштита.

На подрачјето на СВР Скопје во текот на новогодишната ноќ евидентирани се три пријави за прославување на новогодишната ноќ од поголема група луѓе, и тоа на подрачјето на Карпош во стан на бул.„Партизански одреди“, на подрачјето на Центар на бул.„Илинденска“ и на подрачјето на Бит Пазар, во Старата чаршија. По комплетно документирање на случаите ќе бидат поднесени соодветни поднесоци.