Кираца Трајковска и нејзиниот син Гоце Трајковски први го поврзале исчезнувањето на Вања Ѓорчевска во Скопје со исчезнувањето на Панче Жежовски од Велес, посведочи денеска Трајковска пред судот. Семејствата Трајковски и Ѓорчевски имаат старо кумство, па набргу по исчезнувањето на Вања, Кираца го испратила својот син Гоце кај Александар за да помогне во потрагата. Прегледувајќи снимки од возила кои ги обезбедувал Гоце, по начинот на движење, сомнителен им бил цитроен со велешки таблици, а откако потоа на социјалните мрежи виделе дека е киднапиран велешанец, Кираца и Гоце интиуитивно ги поврзале двата случаи.
На прашање од првообвинетиот Палевски дали таа верува дека тој е убиецот, Трајковска рече „ не, посебно ако причината се пари“. Нејзиниот син Гоце Трајковски пак поради паничен напад денеска не се појави во судница. Родителите на Александар денеска сведочеа дека тој не бил должен, бил кратко време зависник и се излекувал.
„Секој од членовите и на семејството и пријатели преземал дејствија по некоја лична интуиција по некое лично согледување и перцепција на работите и без оглед дали тоа во тој момент било реално„, рече Владимир Туфегџиќ, адвокат на обвинетиот Александар Ѓорчевски.
Следното судење е закажно за 20-ти ноември. Малолетната Вања и велешанецот Панче, по кои се трагаше со денови, беа пронајдени убиени на 3 декември минатата година.
Извор : Алсат.мк
