Каракачанов предлага Македонија и Бугарија да бараат во Грција да се подигне споменик на Гоце Делчев

By
Народен Глас
-
0
1108

Бугарскиот вицепремиер и министер за одбрана Красимир Каракачанов во објава на Фејсбук по повод 117-годишнината од смртта на Гоце Делчев повика Бугарија и Северна Македонија пред Грција да го покренат прашањето за подигнување споменик на местото на неговото загинување близу селото Баница, денешна Грција.

„На денешен ден пред 117 години херојски загина Гоце Делчев. Во близина на селото Баница, Серско (денешна Грција), Делчев влезе во битка и го загуби животот, без да го дочека избувнувањето на Илинденското востание неколку месеци подоцна. Ова ќе беше добра можност, заедно со нашите браќа од Северна Македонија, како што вели Договорот за добрососедство, заедно да го одбележиме споменот на Делчев. Се надевам дека причината зошто не се случи тоа не е неподготвеноста на политичарите во Скопје, туку коронавирусот“,пишува Каракачанов.

Тој во објавата посочува и дека „додека ние се расправаме чиј е Делчев, неговиот гроб стои необележан некаде зад олтарот на црквата во уништеното село Баница“.

„Зарем не е време заедно, како братски држави, пред нашиот партнер Грција да го покренеме прашањето за поставување спомен-обележје на Гоце Делчев и таму заедно да го одбележуваме сеќавањето на него? И можеби таму во урнатините на селото Баница, каде што сè уште е духот на Гоце Делчев, ќе добиеме помирување и просветлување за тоа што всушност беше тој“, наведува Каракачанов.