Прес-конференција, Белкиса Зеќири, членка на ИО на СДСМ
Почитувани граѓани, почитувани медиуми,
Втор пат за три месеци нема биолошката терапија за онколошките пациенти, која за нив – живот значи.
Иако директорот на Фондот за здравство, Клековски, ветуваше дека никогаш повеќе нема да недостига терапија.
Пациентите чии животи зависат од секоја доза, од секој ден, повторно се жртви на неспособноста и рамнодушноста на власта. Веќе еден месец ја нема биолошката терапија за рак на дојка, меланом и карцином на бели дробови.
Ова е втор пат за три месеци да снема животозачувувачка терапија.
Нема ниту терапија, ниту одговорност, ниту решение. Само изговори – административни процедури, тендерски планови, „ќе биде“.
Никој ништо не спомнува за одговорност, ниту пак за системско решение.
Зошто тендерот не е распишан навреме, ако уште од февруари се знаело дека ќе недостига терапија?
Пациентите на Онкологија немаат време, тие бараат решение а не изговори.
За хаосот на Онкологија мора да има одговорност, човечки животи се во прашање.
Почитувани,
Здравството е на колена, пациентите страдаат секој ден. Владата на ДПМНЕ го претвори здравството во болен, нефункционален систем каде што пациентите страдаат, а институциите молчат.
Бараме оставка од директорите на Клиниката за онкологија и директорот на Фондот за здравствено осигурување, Сашо Клековски.
Итно обезбедување на потребната терапија. Без калкулации, без повторно „ќе биде“.
Граѓаните заслужуваат здравствен систем кој спасува животи, а не влада која со својата неспособност ги загрозува.
