ЗА ДВА ДЕНА ФАТЕНИ ДВАЈЦА ПОДМЕТНУВАЧИ НА ПОЖАР, ЕДНИОТ ВО ПРИЛЕПСКО, ДРУГИОТ ВО РЕСЕНСКО

0
869

Утрово околу 6.15 часот во месноста Дабница, Прилепско, приведен е М. Е. (34) од Прилеп, поради сомнение дека подметнал пожар, соопшти СВР Битола. Пожарот утрово е локализиран од Противпожарната единица од Прилеп. Лицето е задржано во полициска станица и против него ќе следи кривична пријава до прилепското обвинителство.

За два дена, ова е второ уапсено лице во Преспанско-Пелагонискиот Регион осомничено за подметнување пожар. Според информациите од полицијата, вчера беше уапсен К. С. од Лева Река поради сомнение дека го предизвикал пожарот кај селото, во кој беше опожарена нискостеблеста шума.

Во Преспанско-Пелагонискиот Регион активни се неколку пожари во Прилепско. Општина Прилеп соопшти дека пожарот во атарот на селата Ракле – Никодин – Топлица е активен со јак интензитет. Од село Ракле евакуирани беа двајца неподвижни стари лица и префрлени во нивниот дом во Прилеп. Во селото останати се уште 5 лица, а интервенираат 7 пожарникари од Пожарната од Прилеп и 10 лица од месно население. Пожарот го префрлил регионалниот пат Прилеп – Градско и се шири кон село Радобил.
Пожарот на потегот Дрен – Смолани во кој гори сува трева и смрека е со јак интензитет. На истиот локалитет има и еден приземен пожар на месноста Мањов Дол, каде гори нискостеблеста дабова шума. Интервенираат пожарникари на Пожарната од Прилеп, месно население, како и вработени од Шумското стопанство „Црн Бор“ од Прилеп.
Извор : СДК.МК