Телевизијата Ал Џезира, заради нејзиниот став целосно да известува за опозициските бомби, да анализира, и покрај нејзината скопска редакција, да прати и други новинари да прават емисии и документарци за Македонија, по се изгледа ја нервира власта на премиерот Груевски.
Во оцрнување на оваа телевизија се впрегнаа сите провладини медиуми, не штедат квалификации да ја оцрнат, па таа за нив е џихадистичка и терористичка. Нападите се засилија по „Македонската ноќ“ на телевизијата, кога најпрво се емитуваше интервју со лидерот на СДСМ, Зоран Заев, а потоа и документарецот „Луѓе и моќ“.
Најверојатно и нашата власт по примерот на Кина подготвува терен оваа телевизија да биде недостапна за македонските граѓани освен на интернет.
Телевизијата, чие регионално седиште е во Сараево, а ја води добропознатиот новинар Горан Милиќ (од времето на популарната Јутел) на нападите и навредите засега не реагира и продолжува да ја следи состојбата во Македонија исто како и пред нив.
Во оцрнувањето на Ал Џезира предничи државната МТВ, што е потврда дека нападите се организирани директно од Илинденска број 2 односно од премиерскиот кабинет.
